EDITORYAL - Ipahaom sa sitwasyon

Sa panahon karon nga anaa sa kalamidad ang nasud, ning higayona kining hulga sa novel coronavirus (COVID-19) ang gahum sa nasudnong kagamhanan maoy mopatigbabaw ug igo lang mosunod ang mga naa sa ubos.

Ning bag-o gisumsoman sa mga netizens nga way lingaw kaning panagtigi ni Pasig City Mayor Vico Sotto ug sa DILG ug hasta sa Malacañang bahin sa pagdili na sa pagpamasada sa mga traysikol isip kabahin sa hugot nga gipatumang social distancing.

Si Sotto giingon nga misaway sa maong restriksyon tungod kay magunsa naman lang ang publiko nga kinahanglang mosakay og pasaheroan padung sa ilang destinasyon?

Isip mayor, duna sab siyay kaugalingong pamaagi kun unsaon kini pagsulbad.

Samtang tinuod nga gimandoan ang publiko nga kutob sa mahimo magpuyo lang sa balay ang tanan, apan dili gyud kalikayan nga kinahanglang mogawas aron manarbaho o mopalit og pagkaon ang mga tawo.

Kun tanan nalang mass transport system ang dili tugotang makabiyahe, mag-unsa naman lang ang katawhan?

Maglisod ang gobiyerno pagsuplay og pagkaon sa tanan ilabi na kadtong mga naa sa suok nga bahin sa mga dagkong siyudad. Sila raba kadtong wa nakapamundo og daghan kay sila mga kabus.

May punto sab ang gobiyerno kay ang mga trisikol magsikit man gyud ang mga pasahero ug dako kaayo ang purohang magkatinakdanay ang mga pasahero.

Apan kun social distancing lang maoy hisgotan mahimo man kini basta tumanon lang gyud sa drayber ang protocol. Usa lang ka pasahero maoy pasakyon, kun alkanse sa biyahe, aw di nalang mamasada.

Ang kuwang lang niini, ang pagsinabtanay ug dili magpatas-anay og ranggo. Mas maayong hisgotan kun unsay himuong solusyon kay dili tanang nahunahunaang pamaagi haom sa tanan.

Sa mga netizens diha nga gihimong sumsoman ug gisabong na hinuon ang mga opisyales sa gobiyerno, mas maayong dili nalang paypayan ang baga kay wala gihapon kini ikatabang sa problema.