Ang kaayohan nga namugna sa corona!

Taliwala sa mga dautang panghitabo mugna sa coronavirus o COVID-19 adunay mituyhakaw nga mga positibong panglantaw sa mga kaigsoonan. Dili naman gyud ikalimod nga naa nay nagpositibo sa virus didto Mandaue City nga nakapasamot sa kahadlok ug kabalaka sa mga tawo. Ang uban daw na praning na gani tungod sa kabalaka nga basin naay virus sa lawas ang uban mobati na og kahilantanon bisan wala gyud. Apan gumikan seguro sa nanghinubrang kabalaka o nahurot na ang kabalaka wala nay laing kapilian kon dili magpakalig-on ug mobangon nga makigbisog aron makasugakod sa dakong hulga karon.

Bitaw imbes magmukang nalisang, why not magmukhang positibo ang outlook sa kinabuhi?

Ang kabalaka atong ipadaplin ug hulipan sa pagbati nga puno sa paglaum ug magpadayon sa atong normal life.

Sama nalang sa usa ka bokalista sa banda nga nawad-an og trabaho human nagsira ang balay kalingawan diin sila nagtogtog. Imbes maguol ug magmokmok sa suok, mihimo siya og pamaagi aron makabangon pinaagi sa paghimo og mga home-made face mask.

Sa sinugdanan alang sa iyang pamilya kay wala na lagiy mapalit nga face mask sa mga tindahan, gawas pa nagdaginot siya og kwarta busa naghimo siya og kinaugalingong face mask. Wala siya magdahum nga nisikad pag ayo ang iyang face mask karon nga gilinyahan sa mga silingan, duna usay mga order online. Karon nagpaluki siya sa blessing kun unsaon niya nga mokita ug makatabang sa uban kay barato ra man ang iyang baligya nga tag kinse pesos ang buok.

Ang gikahadlokan nga coronavirus nahimong yawe nga nagbukas sa kahigayonan sa uban nga makapanginabuhi.

Ang kaniadto nga hilabihan ka traffic ang mga karsada, karon hilabihan ka hapsay nga mosutoy lang ang mga sakyanan. Ang kaniadto nga dili gyud halos magkaabot sa balay ang pamilya, karon quality time with family na kay sayo naman manguli ang miembro sa pamilya tungod sa curfew.

Ang kaniadto nga daghang krimen, karon miubos ang crime statistics ngadto sa labaw katunga.

Nakita usab nato karon ang pagpakabana sa katawhan sa isig ka tawo nga magtambayayong alang sa kaayohan sa tanan.

Ug ang disiplina maoy mipatigbabaw karon nga gikinahanglan sundon ang mga lagda o balaod.

Nakita usab sa mga manimbahay ang ka bililhon sa oras inig motambong sa misa human wala una patambongi sa simbahan ang mga misa nga mao na ang naandan.

Kini ang akong realization sa pagtumaw sa coronavirus o COVID-19 pandemic nga maoy nakapaagni sa katawhan sa pagsampit sa atong Labawng Makagagahum.