Yawe sa pagpangita sa kagaw
Ang gisubli-subli nga tambag sa World Health Organization (WHO), nga gibungol-bungolan sa nagkadaghang mga nasud sa kalibotan, mao nga ang labing epektibo nga panagang sa Covid-19 mao ang dinalian nga pagpangita ug pagtambal sa mga masakiton inay sa pagpahamtang og travel bans batok sa mga nasud nga daghan nang molupyo nga natakdan.
Gitataw sa mga eksperto sa WHO nga ang pagpugong sa biyahe sa katawhan mahimong makalangay sa mubo nga panahon apan di gyod makapugong sa pagkatap sa Covid-19. Napamatud-an sa nangaging mga epidemiya nga ang lockdowns ug travel bans di sama kamapuslanon.
* * *
Mapuslanon ang mga tambag ni Dr. Bruce Aylward, nga maoy nangu sa delegasyon sa WHO nga niadto sa China atol sa pagsulbong sa kagaw sa niaging buwan ug busa nakasaksi giunsa pagtambal ang nagbaha nga mga pasyente sa Wuhan ug Hubei, unsaon pagbadlong ang Covid-19:
• Pangitaon sa labing daling panahon ang kagaw;
• Makit-an ang kagaw sa nataptan nga mga pasyente; ug
• Makit-an ang kagaw sa tanang nakaduol ug natakdan sa nahauna nga mga pasyente.
* * *
Mahitungod sa panghinaot nga mawa ang kagaw dungan sa pagtapos sa tingtugnaw ug pagsugod na og saka sa temperatura sa mga nasud nga gihasol sa Covid-19, niingon si Aylward nga di siya mosalig sa kinaiyahan, mas mosalig siya sa napamatud-an nang paagi sa:
• Dinalian nga pagpangita sa tanang nataptan sa Covid-19;
• Pagbuwag gilayon sa mga pasyente aron nga di makatakod sa mas daghan; ug
• Pagsubay sa tanang tawo nga nakaduol sa mga natakdan.
* * *
Ug gitataw nilang Aylward ug ubang eksperto nga ang yawe sa dinaliang pagpangita sa mga kaso sa Covid-19 sa di pa mokatap sa populasyon mao ang hiningusgang testing sa mga laboratoryo sa swab samples sa tanang gidudahang mga kaso. Nga maoy gihimo sa China, Singapore, South Korea ug ubang nasud nga nakaangkon og pasiunang kalamposan sa kampanya.
Nga maoy di mahimo sa Pilipinas. Kay nihit ang testing kits ug sunod buwan pa moabot ang bag-ong gipamalit nga kits. Maong bisan nikumpisal si Health Secretary Francisco Duque III nga nagsugod nang local transmission, di gihapon sila mo-testing kon wa makabiyahe sa gawas sa nasud. Maong nag-lockdown bisan wa pay klaro unsay sunod nga himuon.
* * *
- Latest
