EDITORYAL - Konsumidor mabulahan sa kompetisyon

Kung mahingpit gyud nga balaod ang House Bill 78 nga naaprubahan niadtong adlaw nga Martes diha sa Ubos Balay Balauranan ug kaugalingong bersyon sa Senado, gipanglantawan nga makapabor niini ang konsumidor.

Ang maong balaudnon nga Public Service Act  maghatag na unya og katungod sa mga langyaw nga kompanya nga 100 porsiyentong maangkon ang ilang negosyo dinhi.

Apan ang negosyo kinahanglang sa natad lang sa power, transport ug  communications sectors. Sa pagkakaron, ang mga kompanyang nagpadagan niini mga lokal nga gipanag-iya sa mga dagkong pamilya.

Mapun-an ang kompetisyon tali sa mga local players ug sa langyaw unya nga mamumuhonan dinhi, ug daghan unya ang kapilian sa konsumidor.

Kun dunay kompetisyon, maglumba sab og paus-osay sa presyo sa ilang serbisyo ug produkto ang mga kompanya.

Kun kaniadto gilimitahan lang sila sa 1987 Constitution sa 40 porsiyentong ownership sa public services ug utilities, karon dili na. Siyento porsiyento na nilang maangkon ang kompanya ug magdala unya kini og daghan pang negosyo dinhi.

Ang sektor nga gitugot kanila mao ang  transportasyon, mga riles, cargo services, kuryente, petroleum, mga kanal,  train stations, bus, mga pasaheroan, irrigation , wire ug wireless communication systems ug uban pa.

Aning mga dapita nagkuwang ang Pilipinas mao nga nabiyaan na kini sa mga silingang mga nasud sa Southeast Asia.

Sakit tingali kini alang sa mga negosyanteng pamilya nga ni-monopolized na sa halos tanang public ug utility services kay modaghan naman ang ilang kakompetinsya. Apan pinaagi ning balaora mas gihatagan og importansya ang mga konsumidor.

Kun modaghan ang mamumuhonan, daghan ang makatrabaho ug daghang Pilipino ang mahaw-as sa kalisod.

Tinuod duna gyuy mga dili maayong epekto kining pagsulpot sa mga langyaw nga mga kompanya. Apan trabaho sab sa mga magbabalaod nga mapugngan kini aron masigurong dili moabusar ang mga langyaw nga negosyante sa ilang mga kawani ug sa maong balaod.