Nanagana o kulang sa pagtuo?

Adunay pagabuhaton nga mga kabag-ohan ang Simbahang Katoliko sa mga naandan nga tulomanon ug ritwal nunot sa paningkamot nga mapugngan ang pagkuyanap sa corona virus disease (COVID), matud pa sa CBCP.

Apan walay gikataho nga kausaban sa mga hospital ug ubang tambalanan kansang mga kawani labaw pa’ng natandang sa mga masakiton. Mao ba kini hinungdan ngano gisaway sa Ginoong Jesus ang iyang mga tinun-an sa pag-ingon, “Pagka-diyotay sa inyong pagtoo”? O di ba kaha nanagana lang ang simbahan? Nangutana lang!

Garbo napung-olan

Miawhag si Senator Gatchalian sa DepEd nga i-suspenso o i-oktaba lang una ang pagpaso sa mga mograduwar nga mga estudyante, nunot niining hulga karon sa pagkuyanap sa corona virus (COVID 19).

Sa mga ginikanan nga naglisod intawon pagpaeskwela, dili tingale kini nila igsapayan; apan sa mga adunay ikagasto, dili lang una mahatagan og bili ang ilang unyang laraw pagpasigarbo.  Tungod sa COVID, adunay mga garbo nga napung-olan.  Patas tanan!

Temple of litigation

Miluwat ang Cebu City Business Permit and Licensing Office (BPLO) og usa  ka “show-cause order” ngadto sa tigdumala sa “Temple of Leah” nga nahimutang diha sa Barangay Busay gumikan sa giingon nga daghang mga kalapasan niini lakip na ang kakulang sa business permit. Kini nahitabo human usab makadawat ang City Legal Office sa usa ka suwat gikan sa mga herediro nga mikwestiyon sa pagdumala sa maong patigayon.

Basta katigayonan na gani ang hisgotan, gubot pa sa lukot ang sangputanan.  Kay wala man magsinabtanay, ang templo nga kanhi tourist attraction, nahimo na karon nga templo nga puno sa court litigation.  Saoonz!

Obey first before you complain

Sa iyang privilege speech didto sa Kongreso, gikwestiyon ug gisaway ni Deputy Speaker Pablo John Garcia (Cebu 3rd) ang giingon nga daw pagkontrolar ug pagdiktar sa DILG sa mga kagamhanang lokal sa mga gimbuhaton diin ang naawahi unta ang adunay katungod sa paghikutar ubos sa Local Government Code.

Tungod sa iyang military background, dili kahibudngan ang gibuhat karon sa pamunoan sa DILG, diin daw mipatigbabaw ang lagda sa kasundalohan nga “Obey first before you complain”.  Hinay-hinay lang DILG Secretary, kay pinili (elected) sa katawhan ang imong gimandoan; dili sama kanimo nga tinudlo (appointed) lamang. Isip-isip!

Asa ang hustisya?

Ipadayon na sa Land Transportation Office (LTO) ang pagpanghatag sa mga plaka sa mga sakyanan nga narehistro sa tuig 2015 ug 2016.

Miawhag si Director Caindec sa mga tag-iya sa sakyanan sa pagkuha sa ilang mga plaka aron malikayan ang dakop ug multa.

Sa dihang ang LTO ang nalangan sa pagpagawas sa plaka, wala ra’y problema; apan kon ang katawhan na ang malangan sa pagkuha sa plaka, dakpon ug multahan ka na.  Asa ang hustisya?