Kadudahan ang kamatinud-anon
Makahasol ang mga kaso sa tulo ka langyaw nga nakaduaw sa Pilipinas nga nahibaw-ang may Covid-19 sa pagbalik na sa ilang mga nasud.
Nataligam-an ba lang sila sa pagbantay sa Department of Health (DOH) ug ubang mga buhatan o wa lang gyod ta maninuod pagpangita?
Ang Taiwan, Japan ug Australia pulos niisip sa mga kaso nga “imported” gikan sa Pilipinas.
Apan sa way paghimo og pakisusi, si Health Secretary Francisco Duque III nidiretso pagdeklarar nga ang tulo ka langyaw wa matakdi sa Pilipinas.
Wa gani tukia ang kahigayonan nga mahimong may natakdan sila dinhi sa ato.
* * *
Ang determinasyon nilang Duque ug kaubanan pagpahiyos sa hulga sa Covid-19, puno sa ilang paghunong pagpangita sa mga nakaduol ug posibleng natakdan sa unang tulo ka pasyente kay nilapas na sa incubation period nga 14 ka adlaw, nakapatumaw sa pagduda nga mahimong dugay rang nagsugod ang lokal nga tinakdanay apan wa lang mabantayi.
Ang kamatinud-anon sa pagbantay sa DOH masukod sa gidaghanon sa testing sa Covid-19 nga ilang nahimo:
Ang Research Institute for Tropical Medicine (RITM), ang bugtong laboratoryo sa DOH nga may katakos pag-ila sa bag-ong kagaw, nakasusi lang og 692 ka samples.
* * *
Pila na ka pasyente ang nasusi sa ubang kanasuran?
66,650 ka tests ang nahimo sa South Korea (kansang populasyon nga 51 milyones katunga ra sa Pilipinas) sa semana sa pagsulbong sa ilang mga kaso, gitakdang mohimo og 20,000 ka tests matag adlaw sugod karong semanaha; 1.1 milyones ka tests ang mahimo sa Estados Unidos karong semanaha ug 2 milyones ka tests sugod sunod semana; 18,083 ka tests nay nahimo sa United Kingdom; 3,800 ka tests ang mahimo sa Japan matag adlaw; ug 320,000 ka pasyente ang nahiling sa China sa Guangdong sud sa tulo ka semana.
* * *
Wa magkuwang ang Pilipinas og testing kits: Nakakuha og 3,000 gikan sa Japan ug laing 3,000 gikan sa World Health Organization (WHO); sa niaging semanaha, nihatag ang WHO og dugang 5,000.
Hinaot way sukaranan ang kabalaka nga samtang ang ubang kanasuran naningkamot pagkontrolar sa mga kaso sa Covid-19 ang Pilipinas nipili pagkontrolar sa mga numero.
- Latest
