Mga propeta’ng bakakon

Taliwala sa pagkuyanap sa coronavirus nga giingon nga mikatap na karon sa kapin 70 na ka nasud, mipadayag ang usa ka siyentipiko sa Harvard University nga si Marc Lipsitch nga mahimong matakdan ang mokabat 3-5 bilyon ka tawo sa kalibutan sa umaabot kon mapakyas ang mga kagamhanan pag-implementar sa mga mahinungdanon nga countermeasures pagbatok sa epidemya. Nahisama ang maong pamahayag nga giluwatan sa ubang relihiyosong grupo bahin sa katapusan sa kalibutan. Sa pag-ihap sa akong higala, nakalahutay (survive) na man diay siya og bale walo (8) ka pagtapos sa kalibutan apan walay usa nga nadayon.  Kining uban tawo, sobra bilib sa ilang kaugalingon nga daw mora na sila og Diyos kon makapamulong.  Mga propeta’ng bakakon. Paghilom mo uy!

Luag prisohan, badlongon makauban

SA susamang kalamboan mahitungod sa coronavirus, gikataho nga ang kagamhanan sa Iran temporaryo nga mipagawas sa mokabat 54 mil ka mga priso nga may sentensya nga di molapas sa lima (5) ka tuig, isip usa ka pamaagi pagbatok sa pagkuyanap sa corona virus diha sa mga prisohan.  Balido kini nga rason tungod sa kadaghan sa kaso sa natakdan ug namatay sa maong virus didto sa Iran apan dili pa mahimong ma-apply sa Pilipinas. Kay kon mahitabo, maluag tinuod ang mga prisohan apan hayan mameligro gihapon ang katawhan ky dili lang virus ang ilang makauban kon dili mga tinuod nga badlongon sa katilingban. Isip-isip lang!

“Inyo ang halin, amo ang pangalan”

Naukay karon ang mga netizens labi na ang mga lumolupyo sa Barangay Suba ug Pasil tungod sa giingon’g pagpangangkon sa kan-anan nga ginganlan og “Azul Cebu”nga ila na nga gikuhaan ug trademark ang usa ka matang ug pamaagi sa pagkaon nga ginganlan og “Tuslob Buwa”.  Nakapahinumdom kanako sa akong amigo nga nakiglalis sa laing pasahero sa barko kay nag-ilog sila sa teheras kay managsama ang ilang cot number.  Agi og solusyon, gialsa sa akong higala ang teheras dayon ingon, “Imo na ang cot number, ako ang higdaanan”.  Sa taga-Pasil ug Suba, mahimong moingon pud sila, “Inyo na ang halin, amo ang pangalan”.  Hala no!

 “Basta pulis, matulis”

Natanggong ug nag-atubang karon ug daghang kaso ang hepe sa Argao Police Station tungod sa mga kalapasan nga nabuhat niini sa pagpakigdulog sa us aka babaye nga detenido diha mismo sa iyang buhatan.  Pastilan ka Chief, naghinobra man ang tingale paghatag nimo ug kahulogan sa pulong “priso ug detenido” kay imo man gipapuyo ang konbiktado sa imong opisina.  Tinuod jud diay nga “Basta Pulis, Matulis”.  Pagkatoytoy jud!