EDITORYAL - Kurapsyon sud sa prisohan

Dili gyud mareporma ang mga pinirisong mapaslak sa Cebu City Jail kun duna gihapoy mga kontrabando sama sa ilegal nga drugas nga makasulod ug gibaligya gihapon diha sa maong prisohan.

Makadaghan nang higayon gihimoan og Greyhound Operation ang maong prisohan apan makadaghan gihapong higayon nga adunay daghang mga kontrabandong masakmit gikan sa nagkadaiyang brigada o selda. Niadtong nakalabay nga adlaw nga Sabado, gihimo ang kinalit nga operasyon sa kapolisan sa mga selda. Tuod man, daghan kaayong kontrabando ang nasakpan.

Gikan sa pinaketeng shabu, drug paraphernalia ug mga mahait nga hinagiban hangtud na sa mga butane stove, gas range, mga LPG tanks, de latang beers, ug daghan pang uban.

Kun ang LPG nga tangke makasulod man gani nga wala mabantayi, unsa nalang kaha ang mga pinaketeng shabu?

Basin pa gani, kinilo nga shabu makalusot gihapon gikan sa mga mata sa mga nagbantay diha sa ganghaan kay nakasulod man gani ang mga dagkong kontrabando kana pa kahang drugas?

Makapahibulong kaayo kun ngano ug giunsa pagpasulod niining mga kontrabando kun tinuod pang nagbantay gyud ang mga gwardiya.

Nagpasabot lang kini nga usa ka dakong negosyo sa sulod sa prisohan ang mga kontrabando. Ug dili lang kini dinhi sa CCJ nahitabo, sanglit bisan didto sa National Bibilid Prisons sa Muntinlupa City nga higpit ang seguridad milyones ka pesos ang negosyo sa kontrabando sa sud.

Bisan makapila pa mag-ilis og mga jail wardens sa mga prisohan kun sistema na ang ingon niini nga matang sa negosyo sa sud, dili gyud kini mahunong.

Ang warden sa CCJ mihangyo sa Cebu City nga mapalitan sila og mga gadgets nga magamit pagsikop niining pagpayuhot og mga kontrabando. Apan mag-unsa man ning mga gadgets kun ang mo-operate napalit na?

Ang kurapsyon ug kahangol sa kwarta maoy hinungdan niini. Kinahanglang dunay imbestigasyong buhaton ug silotan ang mga masakpan  kun seryuso ang kadagkoan sa Bureau of Jail Management and Penology pagreporma sa mga mapriso sa ilang prisohan.