Best friend, worst enemy

Marso na diin gibansagan nga fire prevention month tungod lagi usab niining panahona sagad mahitabo ang sunog gumikan sa kainit sa panahon.

Apan bisan niadtong hinapos sa Pebrero nanamilit ang sunodsunod nga sunog.

Kapin sa 300 ka panimalay sa Barangay Suba ning dakbayan sa Sugbo ang naugdaw sa sunog ug mokapin sa 600 ka pamilya ang apektado.

Gitumbok nga hinungdan ang faulty electrical wiring sa usa sa mga balay sa naasoyng barangay.        Gisundan usab dayon kini sa sunog sa Duljo Fatima nga nakalamoy usab og ubay-ubay nga panimalay.

Laing dakong sunog nahitabo sa Ibabao Mandaue City nga miugdaw og ubay-ubay nga mga panimalay.

Common denominator ra ba mao nga wala gyuy napunit nga mga kabtangan ang mga molupyo kay gilamoy sa sunog.

Mas sakit kon kinabuhi ang makalas sama sa nahitabo sa barangay Centro Mandaue City diin nakalas ang kinabuhi sa tulo ka tawo.

Ang mga biktima sakop sa pamilyang Gestopa nga silang ni anhing Judge Gerardo Gestopa, asawa niini nga si Louella ug ang apo niini.

Ingon niini ka bangis ang kalayo kon masuko nga wala gyuy santohon kun dili mag-amping. Busa maisip siya nga worst enemy.

Apan ang kalayo mao baya ang atong katimbang sa matag adlaw diin nakadepende kita niini sama sa pagluto sa mga pagkaon.

Pampainit sa mabugnawng panahon, ug uban pa nga nakadepende sa kalayo nga dili kita mo-survive kon wala siya. Siya ang atong suod nga higala.

Sama sa tawo nga adunay suod nga higala kinsa mamahimo usab nga kaaway kon abusaran ug dili hatagan og bili.

Kon moawas na ang pasensya sa atong best friend mahimo siya nga worst enemy nga moguba sa imong pagkatawo kay nasayod man siya sa imong sekreto. Busa gikinahanglan nato ang doble nga pag-amping nga magpabilin nga suod nga higala nato ang kalayo.

Unta dili lang sa Marso ang fire prevention month kondili sa tibuok tubig, ug sa tanang adlaw aron malikayan ang kasuko sa atong best friend ug dili mag-beast mode nga kaaway.

Amping kita kanunay!