Badjao gipaluyoha’g polis?

Ang magpakilimos sa dalan gidili. Dakpon ang magpakilimos ug ang molimos. Apan may nangadakpan ba?

Sa kadaghan sa polis nga nagpasad sa kadalanan aron dakpon ang masinupakon, wala gyod sila makakita niining mga Badjao, kinsa moduol sa manghunong sakyanan, manuktok sa bentana, mosenyas nga gutom na ug mangayog kuwarta?

Kay kon gihingusgan pa sa kapolisan ang pagsunod ning maong balaod, segurado gayod nga kining mga anino, kinsa naghatag dugang kahasol, babag ug bantayanan diha sa pagmaneho sa karsada, hagbay rang nahanaw.

Dili kay nakatampo lang silag dakong problema sa trapiko. Makapahayblad pa gyod sa mga drayber, kinsa pulos nagdali. Kay simbakog maligsan, kadako uroyg tulubagon?

Mao kini ang nawala sa atong kapolisan – ang pagbadlong-hipos ning mga kinabuhi nga angay ilikay sa kakuyuaw. Kay kon seryoso pa lang atong mananakop pag-implementar ning maong balaod, mahanaw na unta kining mga abog nga makapuling sa karsada.

Sa miaging bulan, alas 9:00 sa buntag mi-parking ko sa likod sa Rajah Hotel. Wala pa nako patya ang makina, may miduol nga batang lalaking Badjao, kinsa nanuktok sa bentana. Gipaubos ko ang diver’s window, diin gitunolan ko sa iyang baligyang labakara.

Mibalibad ko. Pastilan, mibaiid man hinuog samot sa akong sakyanan ug namugos. Mihangyo-pakiluoy ko niya nga dili lang ko. Misenyas man hinuon ni nga mangayo siyag kuwarta kay gigutom kuno siya. Ug sa iyang dagway, miluta ang kinaiya sa pagkamabaharon.

Hinungdan, nga gisukna ko siya: “Dong, nganong di man ka magpabalibad?”

Haskang gahia bataa. Naklaro hinuon, nga ang pagpamaligyag labakara, pasangil ra. Pero ang tuyo, mangayo gihapon. Ug kon balibaran, badlisan ang sakyanan. Maayo kay dihay CITOM nga babaye. Gitawag nako. Ug dihang mipaingon na kini sa akong nahimutangan, mipalayo sab ang Badjao. Gisultian nako ang CITOM bahin sa modus sa mga Badjao, diin dali kining nakatubag nga mapahiyomon: “Nahibawo lagi ka, Sir?”

Usa ka taga-Alaska, Mambaling, Assistant Chief Security Officer, mitug-an. Adunay mga buntag, diha kuno ilawom sa flyover sa maong dapit, nga may sakyanang mokuha sa mga Badjao nga mohatod-ladlad nila sa nagkalainlaing dapit ning siyudad. Ang tag-iya kuno sa sakyanan, polis. Mao ba?

Mao kaha kini hinungdan nganong may mga Badjao gihapon nga magpakilimos sa kadalanan?