Kamatayon sa usa ka Kabus

Daghang mga higayon mohangyo ang mga tawo kanako nga kun mahimo akong librehon na lang ang tanang serbisyo kay lagi kabus man ang namatay. Maayo man kini nga hangyo apan kun buot hunahunaon dili tanan mahimo nimong librehon kini tungod materyales pa lang ug sweldo sa mga tawo dako naman kaayo og kinahanglanon.

Unya sige pa ta ini? Nahinumdom nuon ko niadtong nadestino pa ako sa Yati dunay nihangyo nga kun mahimo sa Misa na lang sila malibre kay lagi sila pobre. Ako silang giingnan sige apan gipangutana ko sila kun pila ba ka adlaw nila hayaon ang maong minatay. Sila nagkanayon nga siyam ka adlaw. Mao ra nay nagkalisud nga mangita og laing kalisud.

Usa sa akong gipangandaman dako uyamot mao  man ang akong kamatayon. Kini tungod kay wala may asawa nga kanako mopalubong mao nga sa plano sa usa ka punerarya ko nagkuha, kini transferable man.

Maayo na lang kini aron sa ingon dili ko makahatag og labad sa mahabilin. Wala pud ko mokuha og mahalon kay sa pagkadugta ra gihapon kini padulong.

Daghang mga tawo nga tungod sa kadaghang bisyo ang dili makatigom, nahimo pa nuong suliran sa nahabilin. Kini tungod kay ang mga tawo man gud ang naghunahuna lamang sa kasamtangan ug wala nila hikit-I ang dakong kalambigitan nila sa umaabot. Sa akong pagsulod sa mamingaw nga prayer room akong nakita ang akong kaugalingon sa dakong pangindahay niini makighiusa sa Dios.

Kini tungod kay nakita ko man ang akong kakabus. Kabus ako ug wa akoy nahuptan bisan usa. Kabus ako ug nagkinahanglan og hinabang gikan sa taas. Kabus ako busa wa akoy angayan nga ikapanghambog.

Kini ang hinungdan kun nganong angayan kitang magpabiling mapaubsanon taliwala sa maayong kapalaran. Kabus ako busa angayan lamang nga diha sa kahilom ako magmapasalamaton sa Ginoo tungod sa mga daghang mga butang maayo nga iyang gihimo kanako.

Nahinanok ako sa makadiyot gumikan sa kakapoy gumikan sa daghang mga gimbuhaton.

Ang maong kakapoy nga akong nasinati nakapahigmata kanako sa kamatuoran nga dinhi sa kalibutan mahinungdanon kaayo ang pagpahuway gikan sa bisan unsang taphaw ug kalibutanon lamang kaayo. Panahon na gyud hapit sa Kwaresma.

Ning maong panahon gidapit kita nga atong tul-iron ang atong paglakaw gikan sa maluyahong panaw sa kinabuhing tawhanon kay lagi kita nagtuo man nga dato ra kaayo kun itandi sa gugma sa Dios.