Ang Gahum sa Katawhan

Gihandum kagahapong adlawa ang ika 34 nga kasumaran sa EDSA People Power Revolution nga maoy hinungdan sa pagkahugno sa gahum ni kanhi Presidente Ferdinand Marcos nga gibansagan nga diktador.

Apan sukwahi sa nangaging kasaulogan sa giilang bloodless revolt nga mabatyagan gyud ang espirito niini, gahapong adlawa mingaw man.

Sa Dakbayan sa Sugbo bugtong nagtikaw tikaw ang mga militanteng pundok kinsa mipahigayon sa ilang lihok protesta.

Balik balik ang mga issue nga gisinggit nila mahitungod sa mga kadismaya sa pang gobierno.

Naa untay namutang og yellow ribbon sa Fuente Osmeña apan nagpahipi ra man sila o nagpakahilom lang.

Sa mga buhatan sa kagamhanan samot na ka mingaw ug walay kisaw nga opposite kaayo kaniadto nga naa pay re-enactment sa salubong o panagtagbo sa mga sundalo ug mga nag unang personalidad sa People Power.

Asa naman ang kasibot sa mga tawo? Hingpit na ba nga nakalimtan ang kabilin o legasiya sa EDSA People Power? O duna ba usab kahay angayan hinumduman sa EDSA?

Moingon ang uban nga ang pagkaangkon nato og demokrasya ang ang usa sa namugna tungod sa panaghiusa sa mga Filipino nga buntogon ang diktadoryang Marcos.

Unsa man diay kaniadto sa martial law nawagtang ang demokrasya? Wala pa man ko matawo atol sa paglabong sa mga Marcos apan matud sa akong mga ginikanan duna bayay daghan nga nahimo sa nasod ang kanhi Presidente Marcos nga hangtod karon atong napahimuslan.

Maot ra kaayo ang tawo nga moingon wala tay nakuha sa Panggobiernong Marcos tungod kay ang tinood naa man gud.

Sama nalang sa mga misunod kaniya sa pwesto unsa man ang nahimo nila? si Cory, Ramos, Gloria, ug Erap?

Si Presidente Duterte nahimo niya nga samaran ang suliran sa nasod ilabi na ang drugas bisan naputos siya sa saway sa pamaagi apan nakita man nato ang epekto niini kay kun wala pay Duterte sa Malacanang aw dugay nang naghari ang mga durugista.

Ang People Power dili alang sa usa grupo kondili natong tanan nga magkahiusa alang sa kalamboan mao na ang tinuod nga gahum sa katawhan.