EDITORYAL - EDSA People Power Revolution

Karong adlawa saulogon ang ika-34 nga anibersaryo sa EDSA People Power Revolution nga nahitabo niadtong 1986, ang adlaw diin napalagpot ang diktadoryang Marcos.

Matag tuig giselebrar kini agi og pagtimaan sa adlaw nga diin nabawi sa katawhan ang demokrasya gikan sa diktadoriya.

Demokrasyang matud pa sa uban karon, giabusaran og maayo sa pipila ug sa mga mapahimuslanong naa sa gobiyerno.

Apan kadto lang ba gyung mga naa sa posisyon? Dili ba hasta ang mga yanong mga tawo, pobre man o adunahan niabusar man sab sa demokrasyang natagamtaman sa katawhan karon nga gihagoan sa uban kaniadto? 

Kana lang daang dili pagsunod sa simpleng lagda sa trapiko, dili mobahig og tarong sa basura, pagbaligya sa boto, dili mamayad sa hustong buhis, ang wala pagtahod ug pagawit sa Lupang Hinirang samtang giisa ang Bandila sa Nasud ug daghan pang uban, matawag na kini nga pagabusar sa demokrasya.

 Daghan ang mga nagpakaaron-ingnong makamao bahin sa maong hitabo apan sa pagkatinuod  ang kadaghanan nila wala pa gani matawo adtong panahona.

Kun nakahibalo man kabahin niini, tingali nakat-onan lang gikan sa eskuylahan o mga estorya apan wala gyud gani tingali nila matugkad.

Duna say sakto’g kabuot adtong panahona, apan karon lang nagsige og pagarpar ug nanaway. Nag-unsa ra man diay ni sila kaniadto?

Sa samang paagi, dili sab mabasol ang mga tawong nagmartsa sa EDSA kay sila man sab kadtong mga biktima sa human rights violations sa Martial Law, mga tawong nahikawan sa ilang kagawasan, nasagmuyo sa dayag kaayong pagpanikas sa snap elections, ug ang uban gipul-an na sa pamunoang Marcos.

Ang nahitabo sa EDSA nga dili lamang politikanhong kalihokan kondili pagpadayag sa katawhan sa ilang gibati batok sa diktadoriya.

Kun dunay negatibong mga nahitabo pagkahuman adto, dili kadto tungod sa EDSA kondili tungod sa pagabusar sa katawhan. Kay wala ampingi ang bunga unta sa pagkabalik sa demokrasya sa nasud.