Silotan gyud

Kinahanglan gyud nga ipakita ni DILG Secretary Eduardo Año nga ang gidumala niyang departamento sa kagamhanan may gahum pagsilot sa mga opisyal sa lainlaing local government units sama sa mga probinsya, siyudad, lungsod ug kabarangayan, kon ang mga opisyal mapakyas pagtuman sa ilang mga tahas.

Kini sama sa paghawan sa mga karsada ug mga aseras diha sa tagsa-tagsa nila ka mga LGU nga karon giabusohan sa pipila nila ka mga lumolupyo. Wala malilong sa katawhan nga daghang mga karsada migamay na pag-ayo ug ang dunay mga aseras nga dili na maagian sa mga tawo kay gigamit personal sa mga abusado

Wala malilong sa publiko nga dinhi sa dakbayan sa Sugbo, daghan kaayong mga opisyal sa kabarangayan ang wala makahimo og aksyon sa binuang sa pipila nila ka lumolupyo tungod sa ilang kahadlok nga masuko kini ug inig-abot sa eleksyon ang maong mga tawo dili na mobotar kanila

Sama diha sa Barangay Caretta sa dakbayan sa Sugbo, dunay karsada diha nga anaa sa maong barangay nga nagsiga lang ang mga mata sa ilang kapitan ug mga konsehal.

Walay mga motorista nga tarong og hunahuna nga ganahan moagi diha aron makalusot sila gikan sa General Maxilom Avenue paingon sa T Padilla Extension.

Kini tungod kay wala mabadlong sa mga opisyal sa barangay, ug sa mga tanod, ang mga tag-iya og sakyanan, nga anaa nagparking sa karsada, ug labaw sa tanan ang mga nagbutang og tindahan sa karsada.

Usa ka konsehal sa maong barangay walay kukauwaw nga mitug-an nako nga ang rason nganong wala sila makahimo pagbadlong sa mga abusado, mao ang kahadlok nga mangasuko ang mga hingtungdang lumolupyo.

Sa ato pa, nagpasuwabe ang ilang kahakog sa pwesto sa kagamhanan.

Dihang midaog sila sa eleksyon ug nanumpa sa tagsatagsa nil aka katungdanan, ang maong mga opisyal nanumpa nga motuman sila sa tanang balaod, ug ila usab kini nga ipatuman sa walay kukahadlok tungod ug alang sa kadaghanan. Apan karon milingiw na sila sa ilang gipanumpaan.

Unta, mahigmata na ang mga botante ug isalikway nila kining mga tawhana sa higayon nga magpapili sila pag-usab.

Ang tinuod, gamay ra kining mga abusado nga nakasamok sa atong mga karsada, ug mas daghan kita nga lang gihatagan og problema.

Unta, ang kadagkoan sa DILG mohimo usab sa ilang katungdanan ug kadtong mga opisyal sa kabarangayan, lungsod ug siyudad nga mapakyas sa paghimo sa gitahas kanila, ila kining pahamtangan og silot.

Kon himoon kini sa DILG, sigurado ko nga ang atong mga opisyal mapugos na sa pagtuman sa ilang katungdanan.