EDITORYAL - Wala gyuy alternatibo?

Lisud ba gyud i-ban ang single -use plastic dinhi sa nasud bisan pa man kamatuorang mao kini ang numero unong kontribyutor sa polusyon sa kalikopan?

Ang rason, wala alternatibong magamit nga ikapuli kun hingpit wagtangon ang single-use plastic.

Ang single-use plastics mao kining mga sachet sa mga shampoo, sabon, gatas, bottle water, ug daghan pang uban nga sagad pagkaon ug mga gamit sa panimalay ang giputos. Ang mga kompanyang naghimo mabalaka gyud manirado tungod kay mao man kini ilang produkto. O dili lang gyud sila gustong mogasto pagpangita og laing alternatibo sa ilang produkto nga eco-friendly?

Kun buot hunahunaon, dili kini rason tungod kay dili naman karon sa panahon sa Stone Age. Daghan nang teknolohiya nga mahimong gamiton aron pagpangita og paagi aron mahimo sila og alternatibo.

Angay tingaling hinuktokan pagbalik ni Senador Cynthia Villar ug sa mga kaubanan niini sa committee on environment ang mga rason nga giladlad sa mga negosyanteng nanghimo aning mga single-use plastics.

Siyaro, wala pa ba gihapon sila nakombinsir sa mga ebidensiya ug mga resulta sa mga pagtuon sa mga eksperto nga ang single-use plastic dako na kaayo og kadaut nga nahimo sa kalikopan? Ang plastic dugay nga nadiskubrehan apan tuig 1960s lang kini nagsugod nga gigamit sa mga produkto tungod kay komportable, paspas, gaan, dili mabasa ug uban pang mga maayong benepisyo kun kini gamitong putos.

Apan samtang tuod gipasayon niini ang kinabuhi sa tawo, nahimo kining hilo sa kalikopan ug usa sa hinungdan ang mga tawong walay disiplina nga pataka lang og labay sa ilang basurang plastic. Dako kaayong hagit sa mga environmentalist nga kombinsihon ang mga magbabalaod aron mopanday og mga balaod o polisiya aron mahunong na kini. Tinuod daghang mga proyekto ug programa pag-recycle sa mga plastic karon apan wala kaayo’y interes ang uban aron mamuhonan niini. Usa sa hinungdan mao ang kakuwang og aksyon sa gobiyerno aron pasundon ang tanan bisan nalang sa simpleng pagbahig sa basura subay sa Solid Waste Management Act sa nasud.