Estriktong paagi pagkuha og lisensya

Nindot kaayo kining lakang sa Land Transportation Office (LTO) nga pakuhaon gyud og driving lesson ang mga mokuha og lisensya sa pagmaneho og sakyanan.

Apil sa mga dokumento nga iduso nila sa paglukat og lisensya ang certification gikan sa driving school nga accredited sa LTO nga nagmatuod nga nikuha gyud sila og driving lesson.

Pagkakaron gud, mahimong mahatagan og lisensya kadtong mga tawo nga dili pa bansay nga momaneho og sakyanan. Ang uban, igo ra makamao mo-drive og motor apan dili bansay sa four-wheel vehicles.

Mao ni ang rason nga ang ubang driver makita nimo nga mora’g nag-drive og motor nga nag-drive og four-wheel vehicles kay nagpabilin man sa ilang hunahuna nga motor ang ilang gimaneho.

Usbon nako, nindot kaayo kining mao nga lakang sa LTO basta wala lang untay mga binuang ug maniobra nga himoon ang mga tagdumala sa mga driving schools.

Gikuyawan ko nga adunay driving school nga igo ra nga mohatag og certification nga magmatuod nga ang usa ka aplikante pagkuha og driver’s license mi-undergo gyud og actual driving lesson ug test, apan wa diay.

Kun estrikto na kining ipatuman, sigurado ko nga mokunhod ang gidaghanon sa mga aksidente sa kadalanan kay maantigo na man ang mga driver kun unsay tukma nga pamaagi sa pag-drive.

* * *

Daghan ang nagbagulbol nga gilugwayan ni Mayor Edgar Labella ang pagpahigayon og night market diha sa dalan Colon.

Bisan ang ubang sakop sa media wala gyud makagusto nga gilugwayan pa ang night market sa dalan Colon ug nga molungtad pa sa Pebrero 29.

Kutob ra gyud unta kini kaniadtong Enero 31, apan si Mayor Labella nadala sa hilak-hilak sa mga sidewalk vendors ug mihatag og lugway kanila nga usa ka buwan.

Akong klarohon nga dili ko supak nga adunay ipahigayong night market kay gitumong kini nga makasapi ang mga vendors, apan kinahanglan nga dili unta anha sa Colon ipahigayon.

Daghan man gud kaayo ang masakripisyo kun anha sa Colon ang night market. Una, ang maong karsada maoy sentro sa downtown area nga agianan sa mga sakyanan.

Kun gusto sa mayor nga tabangan sa siyudad ang mga sidewalk vendors, kinahanglang balhinon sila sa laing dapit nga dili makahatag og grabeng kahasol ang ilang pagpaninda.

Unya, unsa may resulta niadtong imbestigasyon nga gilusad aron pagsuta sa giingong may mga opisyal ug kawani sa Cebu City Hall nga nakakuwarta kay namaligya og puwesto nga kabaligyaan sa mga night market vendors?