Unta himoong prayoridad

Sa pag-usbong sa kalibotanong kahadlok sa kusog nga pagkatap sa 2019 Coronavirus o nCoV didto sa Wuhan, China, atong nakita ang kusog nga pagresponde sa kagamhanan sa maong nasud batok sa maong balatian.

Sa lakang pag-accommodate sa liboan ka tawo nga natakboyan sa maong sakit matag adlaw didto sa Wuhan, ang ground zero sa bag-ong coronavirus, daling miarangkada ang Chinese government pagtukod og hospital alang sa mga pasyente.

Ug sulod lamang sa napulo ka adlaw, mituyhakaw ang higante nga tambalanan nga puno sa kahimanan. Sama sa kilat, nagsugod dayon ang operasyon niini pag-accommodate og mga pasyente sa novel coronavirus.

Sa kadali sa katukoran sa maong hospital didto sa Wuhan, naningangha ang kalibotan. Kini tungod kay mao pa nato pagsaksi sa kapaspas sa pagtukod og hospital. Hinuon dili kini moderno nga pasilidad. Apan world-class ang mga equipment niini.

Tungod niini, nakaingon ko nga lahi ra gayud didto sa laing nasud diin basta proyekto na gani sa inprastraktura, prayoridad gayud kini sa kagamhanan. Dinhi sa Pilipinas, maabtan pagsiyamsiyam ayha matuman ang mga government projects.

Dinhi sa Sugbo, hagbay ra nga gisugdan ang pagtukod sa bag-ong Cebu City Medical Center. Apan hangtud karon wala pa gayud kini mahuman gumikan lagi kay tagitagi lamang ang pondo alang sa konstruksiyon sa maong government hospital.

Nagsugod Ang pagtukod sa bag-ong CCMC panahon sa administrasyon ni Michael Rama, kinsa nagkapuliki pagpangita og dakong salapi alang niini. Apan pagbanos sa administrasyon ni Tomas Osmeña, hinay pa sa kamang sa bao ang dagan sa maong proyekto.

Karon, pabiling nagyaka ang maong proyekto, dakong testamento sa kakulang sa kagamhanan paghatag og prayoridad sa seryosong demand alang sa bag-ong city hospital. Ug niining panahon sa administrasyon ni Mayor Edgardo Labella, hinaut nga mahuman na gayud ang katukoran niini.