Mga panghinaot sa kagaw sa Wuhan
Ang labing masaligon nga pangagpas sa mga eksperto mao nga ang Wuhan coronavirus mabadlong kon mobanos nang mas init nga temperatura sa China ug ubang naabtan nga mga nasud.
Kumbinsido sila nga paspas nga nikatap ang kagaw tungod sa grabeng katugnaw sa Wuhan ug kasilinganang mga dapit sa China nga maoy gigikanan ug nahimutangan sa kinabag-an sa mga pasyenteng natakdan.
Gitumbok nila nga ang Severe Acute Respiratory Syndrome (SARS) nga nakatakod og kapin sa 8,000 ug nakapatay og kapin sa 700 niadtong 2002 ug 2003 nagsugod sab sa tingtugnaw.
* * *
Gihangop sab nila ang pangangkon sa mga doktor sa Thailand nga may nakaplagan na silang tambal—kumbinasyon sa mga tambal batok sa HIV (human immunodeficiency virus), ang kagaw nga mahimong mosangpot sa AIDS (Acquired Immune Deficiency Syndrome), ug pneumonia—batok sa kagaw. Gihulagway nilang pasyente nga natambalan nga hingpit nang nakalingkawas sa kagaw.
Nitataw hinuon ang mga eksperto nga di malaktod ang pagtugot sa bisan unsang bag-o nga tambal.
Kay kinahanglan pang ipaubos og clinical trials—pagtino nga way mas makadaot nga side effects—nga kasagaran molungtad og pila ka buwan o tuig.
* * *
Gipasalig sab sa World Health Organization (WHO) nga kasagaran sa mga pasyente sa Wuhan coronavirus sa 27 ka nasud natakdan sa ilang pagduaw sa China. Matud sa WHO wa pay timaan sa lokal nga tinakdanay sa Pilipinas ug sa kasagaran sa mga nasud.
May mga pasyente na hinuon nga wa kaduaw sa China nga natakdan sa Wuhan coronavirus sa mosunod nga mga nasud: Thailand, Taiwan, Germany, Vietnam, Japan, France ug Estados Unidos.
* * *
Ang giisip sa mga eksperto nga labing dako nga kalainan sa Wuhan coronavirus gikan sa SARS ug MERS (Middle East Respiratory Syndrome) mao nga di siya sama kabangis apan mas mananakod: 10% sa mga natakdan sa SARS ang nangamatay ug usa sa tulo nga natakdan sa MERS ang nangamatay.
Apan nipasidaan ang mga eksperto nga kon di kapugngan ang kapaspas sa padayong pagkatap sa kagaw sa ubang bahin sa kalibotan, labi na sa mga nasud nga mas huyang ang sistema sa pagpanambal, bisan 2% ra sa matakdan ang mangamatay magkahulogan nga 20,000 ang makalas sa matag usa ka milyon nga mataptan.
* * *
- Latest
