A humane way to say “no entry”

Usa na seguro kini sa clever ug safe nga gihimo ni Governor Gwen Garcia sa iyang aksyon mahitungod sa isyu sa 2019 Novel Coronavirus Acute Respiratory Disease.

Kini ang 14 ka adlaw nga pag quarantine sa mga travelers gikan sa nasud sa China aron masiguro nga dili makasulod ug mokuyanap sa lalawigan ang gikahadlokan nga kagaw.

Apan kining maong lakang miani og mga negatibong reaksyon ilabi na sa social media diin daghan usab kaayo ang mga self-proclaimed experts kinsa mikwestyon ug mibugalbugal nganong korintinas lang ug dili man gyud ban o pagdili sa mga intsik nga mosulod sa lalawigan sa Sugbo.

Sa ka agresibo sa mga tawo gusto na nilang diktaran ang mga lokal nga kagamhanan sa paghimo sa gusto nilang mahitabo apan dili ingon niana ka sayon tungod kay duna may mga protocol nga gikinahanglan nga sundon.

Una ang isyu sa pag-ban sa mga tawo gikan sa ubang nasud iya lang sa presidente kay naglambigit na kini sa foreign policy ug international relation.

Giangkon sa gobernador nga very tempting nga moisyu siya og executive order pag-ban sa mga Chinese travelers pero mipatigbabaw ang iyang utok nga nasayod nga limitado ang iyang gahum nga mohimo sa mga butang nga iyang sa pangulo sa nasud.

Bisan pa man niini nakakita gihapon og pamaagi ang gobernador aron makalihok sa pagpugong nga makalusot ang kagaw sa Sugbo.

Dinhi gigamit niya ang utok  sa pagpatuman sa 14 ka adlaw nga quarantine sa mga biyahidor gikan sa China.

Indirectly, gidid-an na ang mga travelers nga mohapit sa atong lalawigan nga sila mismo ang dili na gustong moanhi kay i-quarantine naman sila.

Ang isyu sa NCovARD sensitibo kaayo kay naglambigit kini sa mga tawo ug relasyon sa ubang nasud apan nakalusot gihapon si Garcia tungod kay wala siya mogamit og pulong nga makapasakit sa mga Chinese sama sa “ban.”

Ang 14-day quarantine maisip nga graceful ban o a humane manner of saying “NO ENTRY.”

Angayan hunahunaon sa mga kritiko nga nahimo sa gobernador ang pagdili sa pag-anhi sa Sugbo sa mga Chinese travelers nga wala nasakitan o naka-feel nga sila unwanted visitor kay sila naman ang dili na mobisita.

Moingon ang uban nganong ang mga baboy sa isyu sa ASF gidid-an man nga makasulod sa Sugbo? tungod kay sakop pa man kini sa gahum sa local chief executive.

Kong gusto lang magpahumot ang gobernador mahimo ra niyang sakyan ang gusto sa mga tawo nga i-ban kadtong gikan sa China, apan usa ka thinking governor si Garcia nga mopatuman kon unsay sakto.