Kumpiyansador ang gobiyerno

Nagsugod na karon ang Bureau of Immigration sa pagbalibad sa mga aplikasyon sa gitawag nga visa-upon-arrival (VUA) sa mga grupo sa turista gikan sa Wuhan City, China tungod sa risgo sa pagkatap sa 2019 novel corona virus (2019-nCov).  Apan ato’ng nasayran nga liboan na diay ka mga turista ang nakasulod sa atong nasod sukad sa bulan sa Disyembre 2019 ug hangtud sa bulan sa Enero 2020.  Milutaw nining kahimtanga ang pagkamapasagaron (kumpiyansador) sa atong mga awtoridad.  Adunay nagtrokis nga panultihon nga paboritong kutloon sa akong apohan nga haum niining paghiko-hiko sa atong kagamhanan. Ang una, “Do not segurize the man under the mango tree”; ang ikaduha, “Mucho confianza, mata hombre”. Na hala, kamo na la’y hubad sa lintunganay!

Advance mag-isip ang hapon

Apan sa sukwahi nga balita, nagsugod na karon ang kagamhanan sa Japan sa paghimo og mga lakang nga maghiktin sa mga langyaw nga indibiduwal ug mga patigayon sa pagpalit og yuta labi na kadtong duol sa mga pasilidad nga may kalambigitan sa national security  nga mahimong makakompromiso sa ilang seguridad.  Giangkon sa Japan nga nabalaka sila sa mga pagsuway nga gihimo sa China sa pagpangawkaw og mga teknolohiya ug ubang mahinungdanon nga inpromasyon maoy hinungdan sa ilang pagpanagana karon. Mao kini ang giingon sa akong higala nga Intsik nga “Wa ka PALANGGANA, BASO ka (Wa ka’y panagana, basol ka)”. Advance mag-isip ang Hapon!

Pagkahugawan ra ang hinungdan

Tungod sa kakuyaw nga gibati karon sa katawhan gumikan sa gikahadlokan nga pagkuyanap sa 2019 new corona virus (2019-nCov), miawhag ang mga awtoridad sa katawhan paghimo og mga lakang aron malikayan ang pagtakod sa maong virus.  Pipila sa gisugyot nga lakang mao ang pagsul-ob og mga surgical masks, paglikay nga maduol sa mga mananap sa umahan o mga ihalas, pagpalayo sa mga tawo nga may sintomas sa sip-on o hilanat ug ang pagseguro nga maayo ang pagkaluto sa mga pagkaon.  Kon sumadahon, ang mga lakang sa paglikay nga dili matakdan sa corona virus, pulos batakan nga pamaagi sa pagbaton sa kalinis.  Sa ato pa diay, walay lain nga hinungdan ang sakit, ang pagkahugawan ug pagkayam-angan ra gayud sa tawo. Saoonz!

Karaan na nga kansiyon

Mipasidaan ang kasamtangan nga hepe sa Philippine National Police (PNP) nga si Gen. Francisco Gamboa nga mopratuman siya sa “one-strike policy” diin palagpoton niya sa ilang pwesto ang mga station chiefs og district commanders kon dili nila masumpo ang mga illegal nga pasugalan ug ubang mga krimen diha sa ilang hurisdiksyon.  Mora man kining pasidaan og karaan’g kansiyon.  Apan manghinaut lang gihapon kita nga dili kini mahisama sa mga nangagi, diin nag-una lang ang paukyab apan wala gayod makapakunhod sa gidaghanon sa mga badlongon nga polis.  Kon unsa ka seryoso ang panguwarta ug tinonto sa kapolisan, labaw pa unta usab ka seryoso ang pag-disiplina kanila sa Chief PNP. Palabwi pa Chief!