Infodemic mas viral pa sa virus

Mao kini ang termino ni Dr. Van Phillip Baton, Medical Coordinator sa Department of Health Region 7 sa exagerated information o fake news nga mikuyanap sa social media mahitungod sa gikahadlokan nga Coronavirus ilabi na gyud ang 2019 Novel Coronavirus o NcoV.

Mipahimangno ang DOH sa katawhan nga magmatngon gyud sa mga virus dili lang sa balatian mugna sa kagaw kon dili virus sa social media nga binuhatan sa mga tawong walay lingaw nga gusto lang mohimo og kahasol o kabalaka sa isig ka tawo.

Daghan kaayo ang mga eksperto karong panahona nga murag sila na gyud ang maayong laki, all around doktor, analyst ug uban pa nga nasayod sa tanan, maayo unta kon sila insakto.

Sila ang matang sa tawo nga mismo virus sa atong katilingban kay ang ilang binuhatan labaw pa man ka delikado sanglit maghimo man og sayop nga mga impormasyon gamit ang social media platform nga daghan sad kaayong mailad.

Ang isyu sa Coronavirus seryoso kaayo tungod kay kinabuhi man ang nakataya niini busa angayan kitang magmatngon dili lang sa pagprotiher sa atong kaugalingon kondili panalipdan usab nato ang atong komunidad gikan sa posibleng panic nga mamugna tungod sa iresponsable natong pag post sa social media sa mga information nga atong nasagap gikan sa walay klaro nga source, i share dayon.

Mas dali pa nga nikatap ang fake news virus o infodemic kay sa kagaw o virus, negatibo pa ang Pilipinas sa NcoV apan positibo na kita sa kagaw sa mga hinanggaw nga kasayoran nga gikan sa mga hanggaw ug amaw nga walay mga lingaw.

Bitaw ok ra man nga mag over prepared sa ingon niini nga sitwasyon apan labawng overacting kun mag-panic na tungod kay nadala na ta sa atong kabalaka.

Sa giingon sa mga health officials mamahimong kabatokan nato ang bisan unsa nga balatian kun lig-on ang atong immune system.

Naa ra sa atong mga kamot ang taming nga dili kita mataptan sa sakit inubanan sa hugot nga pagamping.