Ug gibiyaan nila ang ilang seguridad

ENERO 26, 2020: Ikatulong Domingo sulod sa tuig

National Bible Sunday

Mga Pagbasa:  Is. 9;1-4/Sal. 27/1 Cor. 10;13,17/Mt. 4;12-23

Sa atong ebanghelyo karon nahimong tipikal kaayo ang sugilanon sa mga unang tinun-an sa atong Ginoo. Ila kining vocation story nga sa ato pa, sugilanon kini sa ilang tawag. Dunay transition nga nahitabo ug kini naglangkob ning mosunod:

1. Una busy kaayo sila sa ilang naandang buluhaton sa pag asikaso sa ilang sakayan ug sa ilang pukot.

2. Ikaduha, nahiagi si Jesus ug nidapit kanila sa pagsunod kaniya.

3. Ikatulo, gibiyaan nila ang ilang pukot, sakayan, ug gani ang ilang amahan!

Sa ilang pagbiya sa ilang pukot ingon man sa ilang amahan nakita nato dinhi ang usa ka dakong risgo. Kamatuoran kini nga naglambigit sa pagbiya sa ilang seguridad. Ug kun maghisgot kita og seguridad ang gipasabot niini mao man ang ekonomikanhong seguridad. Kaniadto man gud ang katilingban nakasentro sa Amahan kun Patriarch. Kun unsay panginabuhi sa Amahan, mao usab ang panginabuhi sa anak lalaki ug dili mahimo nga magpalayo ka gikan sa imong Amahan, ang Amahan mao man ang imong seguridad. Sa gihimo sa mga unang tinun-an nga nibiya sa ilang Amahan nga Sebedeo sama lang nga ilang gitalikdan  ang ilang seguridad. Mahimong magdala kini kanila sa ekonomikanhong kalaglagan. Apan bisan pa niini, nirisgo sila alang sa mas linain pa nga buhat ug misyon.

Dili  lalim ning kinabuhi isip tinun-an. Sa atong pagsunod sa mga tunob ni Jesus ug sa atong paghigugma kang Jesu Kristo mismo daghan kita og biyaan. Biyaan nato ang giisip natong mahinungdanon alang kanato. Biyaan nato ang tingali giisip natong seguridad. Ning paagiha nahimong mas malisud alang kanato ang tanan kun ugaling mag lingi lingi kita.

Nahinumdom nuon ko sa usa sa among  mga Layko Ministro dinhi sa amo nga sa dihang giingnan siya sa iyang kauban niadtong bag-o pa siya, nga di maayo nga magdaro nga maglingi lingi, nasinta siya ug nasuko apan sa kaulahian sa diihang nabasa niya kining ebanghelyo ug nagdugay na pud siya sa serbisyo nakasabot ra gihapon siya sa kamatuoran nga nagpahipi ning maong teksto. Mao nga mopahiyom na lang siya ug dasonan gyud niya ang  kamatuoran niini ginamit mismo ang iyang kaugalingong kasinatian ug kinabuhi.

Karong Domingoha NATIONAL BIBLE SUNDAY usab. Ang pinakanindot sa tanang mga libro kun buot hunahunaon. Ang Balaang kasulatan mahinungdanon. Mao nga ato gyud kining basahon, tun-an ug I apply sa atong kinabuhi.Magbasa ta sa Bibliya aron motubo ta! Kay matud pa baya ni San Geronimo: “Ignorance of Scriptures is Ignorance of Christ!”