EDITORYAL - Malungtarong solusyon

Husto si Presidente Rodrigo Duterte sa pag-ingon nga walay laing paagi aron masolusyonan ang problema sa trapiko sa Sugbo kondili ang railway system nga ipaagi sa ibabaw.

Apan samtang tinuod nga dako kini og gastos, mao lang kini ang long term solution aron masulbad kining problemaha.

Ang kasamtangang gilihok nga Bus Rapid Transit nga giduso sa kanhi administrasyon sa Dakbayan sa Sugbo pang stop gap lang, band aid solution.

Kay kun buot hunahunaon, anha gihapon kini magdagan sa mga naghuot ng daan nga mga karsada nga puno sa mga sakyanan karong mga panahona.

Ang Cebu City is an old city, karaang siyudad nga naabtan sa panahon. Ang mga gagmay nga kadalanan niini adto ibasol sa mga nangaging mga mayor sa dakbayan nga wala managana unya sagulan pa og pamolitika, misamot.

Naabtan sa paglambo ang siyudad, nidaghan ang mga balay patigayon ug nidako ang populasyon, apan ang mga karsada sama sa dalan Colon, mao ra gibapon sa panahon pa sa mga Katsila.

Karon padaganan pa og BRT? Makatabang ang BRT sa problema sa kakuwangon sa masakyan, apan makapasamot kini sa trapiko.

Dako ang kwartang kinahanglanon pagpalit sa mga road right of ways para sa road widening aron dunay kabutangan ang BRT. Asay maayo og mag road widening dayon tukoron ang plano ni Duterte apan way BRT, sigurado gyung moluag ang trapiko.

Apan ang plano sa nasudnong kagamhanan dinhi sa Sugbo mao ang Integrated Intermodal System (IITS) nga maglakip sa BRT ug monorail systems.

Si Konsehal Joy Young sa Cebu City ug ang representante ni Duterte dinhi sa Visayas nga si Secretary Michael Dino nagkatinubagay na kabahin niining gisaad sa pangulo. Natural depensahan ni Dino si Duterte samtang si Young angay sab unta mohatag og alternatibong solusyon nga malungtaron.

Kahigayonan na kini sa Sugbo nga makaangkon og modernong matang sa transportasyon ug kasulbaran sa magkagrabe pa unyang problema sa traffic kay dunay presidente sa nasud nga gustong motabang.