Sa bukana sa bulkan

Basta makabisita gani sa mga probinsiya sa Cavite, Batangay ug Laguna, dili gayud kompleto ang tour kun dili makaadto sa dakbayan sa Tagaytay ug magpahulgway nga nagtalikod sa maanindot nga Taal Volcano.

Ang Taal Volcano, usa sa labing gamay nga bulkan sa kaliboban, nahimo nang usa sa labing nag-unang tourist destination sa Pilipinas. Liboan ka lokal ug langyaw nga mga turista ang magpunsisok pagbisita niini matag tuig.

Usa ako sa swerteng nakaadto sa bukana sa maong bulkan ug nakasaksi sa kaanindot niini. Gani wala ko magdahom nga sa kahilom niini, adunay pag-alburoto diay sa ilalum niini nga misangpot gayud sa pagbuto sa maong bulkan niining panahona.

Pipila ka tuig na ang nakalabay, usa ako sa mga mamahayag gikan sa Sugbo ug laing mga lalawigan nga nakaadto sa Taal Volvano isip kabahin sa media tour nga gipasiugdanan sa usa ka sa dakong power company sa nasud.

Samtang didto kami nangaon sa usa ka restaurant sa Tagaytay, nindot kaayo ang view sa Taal Volcano nga sigehan namo og tutok sa among mga cell phone. Dili gyud mahimo nga dili ka makuha og hulagway sa maong bulkan niadtong tungora. Samot ka excited ang among grupo sa dihang nanakay na kami og pump boat latas sa Taal Lake paduol gayud sa bulkan. Hangtud nga natungas gayud namo ang kinatumyan sa bulkan human sa pipila sa minutos nga pagsakay og kabayo.

Usa sa nindot nga butang nga akong naekperyensiya sulod sa akong profession isip mamahayag mao ang pagsud-ong sa kaanindot sa hinimo sa kinaiyahan, usa ka masterpiece nga perpektong hinikay sulod sa milyones ka tuig.

Apan sa pagbuto sa Taal Volcano, maoy misantop sa akong hunahuna kun naunsa na kaha ang kanindot sa crater ug ang palibot niini. Wala ko magdahom nga moulbo pa diay kini pag-usab tungod sa pagkakalmado niini sulod sa pipila na ka dekada.

Sa atong nabasa ug nakita, hilabihan ka dako ang damyos niining bag-o nga pag-ulbo sa Taal Volcano. Gatusan ka libo ang na-displaced tungod sa bagang abo nga mitabo sa mga komunidad palibot sa maong bulkan.

Manghinaut lamang kita nga dali ra nga makabangon ang atong kaigsoonan kinsa na-displaced sa maong pangtihabo. Kini aron nga makabalik na sila sa ilang normal nga inadlaw nilang panglihoklihok.