Viva Pit Senyor!

ENERO 19, 2020: Piyesta ni Senyor Santo Niño

Mga Pagbasa: Is. 9;1-6/Sal. 98/Ef. 1;3-6.15-18/Mt. 18;1-5.10

Kini kasagaran ang atong madungog karong mga panahona labina gyud sa hawanan sa Basilica Minore del Santo Niño ning atong Dakbayan. Hinuon sa akong bahin, kontento na lamang ako sa paghimo og piyesta senyor sa among parokya sa Madridejos, Alegria. Dinhi sa amo among gisugdan ang nobena niadtong Biyernes ug tapuson usab namo kini karong petsa 26. Hinuon bisan asa man tingaling parokya sa artsidiyosesis ang naghimo man sa ingon. Sa laktod, dako gyud ang atong pagmahal sa batang Jesus diha sa atong kinabuhi. Apan kun buot hunahunaon niadtong kapanahonan sa atong Ginoo nahimong sakop man sa marginalized sector ang mga  kabataan. Ang mga bata ingon man ang mga babaye way labot sa kwenta o  pag-ihap ug kay daw sa wala man mahatagi og igong pagtagad daghan sa mga kabataan kaniadto ang mangamatay na lang kay mas palabihon man og atiman ang tiguwang kaysa mga bata.

Apan surprising kaayo kay ang gihimong sukaranan ug rekisitos ni Jesus niadtong buot mosulod sa gingharian langitnon kinahanglang magpakasama sa usa ka bata o modawat gyud sa bata. Nga sa ato pa, gihimo niyang sumbanan ang kinaiya sa usa ka bata ingon nga sukaranan sa kinabuhing truly alive! Kay unsa man diay ang naa sa bata?

Ang bata matud pa kontento lamang kun unsay anaa. Labina kun maghisgot kita og mga bata nga linghod pa ang panuigon. Ang bata kontento sa kasamtangan ug gani mahimo niyang saulogon ang yanong paagi ang iyang adlaw nga natawhan pinaagi sa mga duwa bisan pa man kun yano lang gyud kaayo ang salo salo.

Nahinumdom ko sa akong mga pag-umangkon kaniadto nga nanuroy mi sa SM wala na kaayo sila magtalinga sa pagkaon nga akong gipalit kay lingaw kaayo sila sa mga rides. Dili kabayran og salapi ang ilang bahakhak. Alang nila nindot na kaayo ang panahon. Hinuon wala na lang nako sila dad-a sa Toy Kingdom kay lisud nang mahurot ang kwarta kay seguro kong mopili gyud sila sa ilang higustohan.

Apan lahi na kaayo kitang mga dagko. Nahimong komplikado ang atong kinabuhi, dili ta kontento kun unsay naa, alang nato walay kaambong ang bisan unsang ubos ug ordinaryo alang nato buot kitang anaa kanunay sa hataas nga hut-ong sa katilingban. Mao nga malisud gyud alang nato tuod ang pagsulod sa Gingharian.

Ning atong pagsaulog sa piyesta senyor atong sangpiton siya nga unta mahisama kita sa iyang kasingkasing nga malumo, mahigugmaon, ug mapaubsanon. Magpabilin unta kanato ang sense of wonder sa bisan unsang gimugna sa Dios. Magpabilin unta kitang moduol kaniya bisan pa man kun dili na siya bata sanglit ang siya nihamtong man. Apan pabiling bata ug lab-as ang mensahe sa Ginoong Jesus: Paghigugmaay kamo ingon nga ako nahigugma kaninyo!” Viva Pit Senyor! Viva!