Uyon ba mo niini?

Kay madayon man gyud nga moanhi sa Dakbayan sa Sugbo si Presidente Duterte karong Domingo ug mosaksi sa kalihokan sa Sinulog grand parade, angayan ba gyud nga sakripisyohon ang katawhan pinaagi sa estrikto nga mga sakop sa Presidential Security Group?

May mitug-an nako nga ang Presidente moabot sa hapon na, ug mahimo pa gani nga anha na kon motikyop na ang kagabhion. A

ng pangutana, sa buntag pa angay na ba nga mag-estrikto ang mga sakop sa PSG?

Nahibaw-an na man gud nga kun ang presidente mobisita sa usa ka lugar, ang PSG maoy magbuot ug bisan ang kapolisan mag-agad na sa ilang kamandoan.

Wala gyud ko makalimot nga diha’y higayon nga mitambong si kanhi presidente Noynoy Aquino sa Sinulog grand parade ug misulod sa Sports Center, sus, estrikto kaayo ang mga PSG.

Bisan gani ang mga sakop sa media, gidid-an gyud sa pagdala og ball pen ini’g sulod nila sa sports center. Dili ba naghinobra na ang PSG?  Nganong did-an man ang katawhan sa pagdala og ball pen ug mga kutsara’g tinidor nga diretso ra man unta sila nga mosaka ngadto sa ilang lingkoranan sa grandstand?

Ayaw ko’g ingna nga ang ball pen ug tinidor nga dad-on sa mga tawo nga mosaka sa grandstand, ilang gamiton pag-target sa presidente?

Labaw na nga ang mga sakop sa media dili angay’ng did-an sa pagdala og ball pen kay unsa may ilang isuwat aron dili makalimtan ang gisulti sa presidente ug ubang news source nga ilang ma-interview?

Para kanako, over acting ra gyud kaayo ang mga sakop sa PSG. Unta, dili kaayo sila magpalabi og estrikto.

Gimahal sa katawhan si Presidente Duterte ug pagmatuod niini, makabungog nga botos ang iyang nakuha sa Sugbo.

Tungod niana, dili kaayo angay’ng mahadlok ang mga PSG nga may mopasakit ni presidente.

* * *

Karong hapon, mouban ko sa solemn procession sa imahen ni Senor Santo Niño.

Pito ka kilometros ang akong lakawon aron pagtuman sa akong saad nga kada tuig, magsakripisyo ko pinaagi sa pag-uban sa solemn procession.

Tungod kini kay giluwas ni Santo Niño ang akong kinabuhi gikan sa tino nga kamatayon dihang naaksidente ko kaniadtong Hunyo 25, 1995 didto sa Catmon.