Bag-ong maskara: bra ug panty

Tungod sa taas nga panginahanglan sa N95 face masks, midasig ang Department of Health sa paggamit og mga alternatibong maskara, sama sa bra, panty ug bisan gani ang diaper, aron mapanalipdan ang katawhan sa mga kadaut nga dala sa volcanic ash.  Kon magsul-ob na ang katawhan sa mga alternatibong maskara, malupigan na si Superman kinsa gisaway kay gisul-ob niya iyang brief sa gawas sa iyang karsones.  Dili ba kaha daghan’g hinayhay nga underwear sa mga babaye ang kawaton tungod niining maong awhag sa DOH? Hala no?

Paleho la lage!!

Dugang pahimangno sa DOH nagdili sa katawhan sa pagkaon sa mga isda nga makuha gikan sa Taal Lake aron malikayan ang posibilidad nga malanag ang mokaon niini nga mahimong moresulta sa pagsakit sa tiyan, pagsuka ug pagkalibanga.  Parehas ra man usab ang bati-on nga sintomas sa tawo nga walay kaon, gani madungangan pa kay molabad man ang ulo ug mosiga pa ang mga mata.  Kon mokaon, masakit; kon way makaon, labaw pa’ng masakit.  Na hala pili lang mo.  Matud pa lage sa Intsik, “Paleho la!”

Naanad na mao’ng nadakpan

Bag-ong lagda sa trapiko gipatuman karon sa CCTO labi na sa mga dalan duol ug nagpalibot sa Basilica Minore del Sto. Nino diin wala na’y bayad ang parking fee ingon man wala na’y clamping sa maong mga lugar.  Taas-taas  ang panahon sa pagpatuman sa bag-ong lagda, bisan temporaryo lang, nga mahimong makapaanad ug makapahigalam sa mga motorista.  Inig libkas sa maong temporaryong lagda, daghan usab dayon ang motiyabaw kay nadakpan.  Karon pa lang, mora’g naa na’y magsinulog nga magkanayon, “Pit Senyor, way klaro kini!” Pwera gaba ang tawo!

Tujok-tujok ra ang kawsa

Gikataho nga ang mga nagkalainlain nga transport groups nagkahiusa sa ilang reklamo nga angayan na patas-an ang minimum nga plitehan ngadto sa 12 pesos.  Kon momahal na ang plitehan, himoon na usab kining rason sa mga negosyante aron patas-an ang presyo sa mga palaliton.  Mao na usab unya kini hinungdan nga mangayo na usab og usbaw sa plitehan ang mga driver kay lage mahal na ang palaliton.  Matud pa sa amo sa Leyte, “Tujok-tujok ra gajod ang kahimtang sa kalibutan”.  Modaghan na unya ang mamukongay sa plitehan. Faeetz!

Padulong ra sa status quo??

Wala pa mopakanaug og desisyon si Gob. Gwen Garcia mahitungod sa hangyo sa Cebu City sa pagbalhin temporaryo sa South Bus Terminal ngadto sa SRP atol unya sa kasaulogan sa Sinulog 2020 Mardi Gras. Buot sa Gobernador nga tun-an pa ang maong hangyo ug nga makig-storya pa siya sa mga hingtungdang opisyal sa dakbayan.

Daw awahi na man kon ipatuman ang maong laraw.  Daghan usab nga sumasakay ang maapektohan.  Resulta na ba kini sa ato’ng giingon sa una nga “Daghang kusinero makapalas-ay sa sabaw”?  Daw padulong man kini sa status quo? Abangan!