Ang Panalangin nga Gipangayo

Kun dunay mga mahinungdanong okasyon sa kinabuhi pagahimoon gyud nato ang pagpanalangin sa mga tawo nga hingtungdan.

Dinhi sa parokya ni San Jose sa Madridejos gihimo man namo ang pagpanalangin sa mga tawo o bata nga nagsaulog sa ilang adlaw nga natawhan, pagpanalangin sa mga inahan panahon sa Mother’s Day o sa mga amahan panahon sa Father’s Day.

Bisan gani ang yanong pagtapion sa mga kamot sa ulo sa usa ka bata dako naman kaayo og kahimoan aron masinati sa hingtungdan nga siya gyud gipanalanginan.

Apan kun buot hunahunon kadaghanan nato ang nahimong tihik sa paghatag niini.

Tihik tungod kay sa maong pagpangayo ang gipangayoan nga mohimo ang magdumili man sa paghatag.

Nagdumili sa paghatag kay ang gipangayoan kaha tingali nahikalimot sa dakong bili sa paghatag ning maong panalangin. Kada adlaw kahigayonan sa pagpanalangin.

Akong gidasig ang matag ginikanan nga sa dili pa molakaw ang ilang mga anak ila gyud silang panalanginan labina gyud ang amahan nga mohimo sa ingon.

Sanglit ang paghatag sa panalangin mamahimong gamhanan kini tungod kay sila dunay spiritual power ngadto sa ilang mga anak sila gud ang mga ginikanan. Mao nga ang ginikanan bisan diha sa dakong kasuko ang unta dili motunglo sa ilang mga anak kay kini makadaut man gyud kanila.

Ang mahinungdanon ug husto mao man ang paguyo sa kinabuhi sa panalangin.

Dili gyud unta nato ni ihikaw ni bisan kinsa nga nagkinahanglan niini. Ang Dios man gani nga maoy tinubdan sa tanang panalangin ang nihatag man niini kanato bisan pa man sa higayon sa atong pagkahinanok.

Walay rason nga kitang napiskan niini ang dili mopaambit niini.

Kay ang maong pagpaambit usa man ka paagi sa paghimaya sa Dios nga maoy tinubdan sa tanang kaayohan.

Kini akong pag-ampo alang kaninyo:

Panalanginan unta kamo sa Dios Amahan!

Lig-onon unta kamo sa Dios Anak!

Hayagan unta kamo sa Dios Espiritu Santo!

Amen! ug Amen!