Masuko diay mo?

Daghan kaayong nangreklamo kay ang ilang mga sakyanan gi-clamp sa mga traffic enforcers kay giparking daplin sa mga karsada duol sa Basilica del Santo Ni?o.

Halos kada adlaw daghang sakyanan ang ma-clamp sa mga traffic enforcers kay gahi man gyud kaayo’g ulo ang mga tag-iya. Siyaro na man usab og wala sila masayod nga gidili ang pag-parking daplin sa karsada duol sa Basilica ug sa Cebu City Hall?

Bisan ako nahasol usab kay wala na gani ko makadala sa akong sakyanan matag adto nako sa City Hall. Diha’y kausa nga giparking nako ang akong sakyanan didto sa SSS, maayo na lang kay naatol nga nag-follow up ko sa akong transaksyon sa maong opisina.

Gikan sa SSS nga nahimutang sa Osme?a Boulevard, naglakaw ko og mga usa ka kilometro paingon sa City Hall ug Basilica del Santo, ug balik sa SSS. Wala ko magpataka og parking sa akong sakyanan kay nasayod ko unsay mahitabo kon ako kining himoon.

Pagkauwaw kaha no nga sakyanan sa usa ka sakop sa Cebu City Traffic Management Board ma-clamp kay nagpataka og parking? Mao nga tambag nako sa mga dunay sakyanan, ayaw na lang mo pagdala og sakyanan kon wala mo’y driver.

Aw, kun may P1,500 mo nga ibayad sa multa, ug moagwanta mo sa dugang kahasol, hala ipataka na pagparking ang inyong mga sakyanan sa mga dapit nga giisip na nga “No Parking Anytime” samtang nagsaulog pa kita sa kapistahan ni Se?or Santo Ni?o.

Hinoon, gimando ni Mayor Edgar Labella nga walay clamping operation gikan sa alas 10 sa gabii hangtud sa alas siete sa buntag gikan karong gabii hangtud sa Enero 20, apan kon molapas sa oras, anha na i-clamp ang mga sakyanan.

Basta pahinumdom lang, ayaw i-double park ang inyong mga sakyanan kay i-clamp gyud gihapon basta mag-double parking na. Happy Fiesta Se?or kaninyong tanan!

* * *

Mora’g apektado na kita dinhi sa Central Visayas sa aso nga gibuga sa miulbo nga Taal Volcano didto sa Batangas. Kagahapon, kanunay lang nga daw madag-omon ang atong kawanangan, apan walay uwan.

Ang aso na diay kini gikan sa mibuto nga bulkan ug maoy nakapalandong kay gisalipdan ang kahayag sa adlaw. Unya, timan-i, apektado usab kadtong mga hubakon kay mahanggap man nila ang aso nga may sagol sulphur.

Tambag nako sa mga hubakon nga ayaw kaayo mo paggawas sa inyong mga kuwarto aron nga dili kaayo kamo magrabehan sa aso nga dili nimo makita apan makadaot sa inyong lawas.