Leksiyon sa saad

Sukad namugna ang Dangerous Drugs Act of 2002, ang gidaghanon sa mga tiggamitan og gidili nga drugas mius-os gikan sa 6.7 ka milyon niadtong tuig 2004 ngadto sa 1.3 ka milyon na lamang niadtong 2012. Apan ang Philippine Drug Enforcement Agency (PDEA) mibana-bana og upat ka milyon ka mga tiggamitan og drugas sa tuig 2019.

Ang datus sa Philippine National Police Drug Enforcement Group, nga maoy gibasihan ni Bise Presidente Leni Robredo sa iyang taho sa katawhan, nagpakita nga ang mga migamit og gidili nga drugas mihurot og 156,000 ka kilong shabu matag tuig. Gibana-bana kini nga mibalor kini og P1.3 trilyones matag tuig.

Ang PDEA, sa taho niini sa tuig 2019, nakakonpiskar og 1, 344 ka kilo nga shabu gikan sa Enero hangtod sa Oktobre. Mas taas kini kun itandi sa 785 ka kilo nga nakonpiskar niini niadtong 2018 ug 1,053 ka kilo nga nakonpiskar niadtong tuig 2017.

Tungod niining maong mga datus, si Robredo miingon nga ang gobyerno nakakonpiskar lamang og usa ka porsiyento sa kinatibuk-ang supply sa gidili nga drugas sa nasud.

Mao kini ang gihimong basihanan sa bise presidente sa iyang paghatag og hagbong nga grado sa kampanya sa administrasyong Duterte batok sa gidili nga drugas.

Apan ang Malakanyang wala manumbaling ug nagpalingog-lingog sa gipaboto sa bise presidente ug wala motuo sa datus nga gipagawas niini.

Kun imong tanawon, tinuoray daw nga wala matandog ang operasyon sa drugas dinhi sa nasud bisan pa man kun ang mga tawong nalambigit niini gipang patay o gipang ihaw.

Apan dili ikalimod nga ang administrasyong Duterte naningkamot sa pagwagtang sa suliran sa gidili nga drugas tungod kay mao kini ang nagdala ug nagpalingkod sa presidente sa Malakanyang.