Report ni Leni

Gihulagway ni Bise Presidente Leni Robredo nga usa ka dakong palpak ang kampanya sa administrasyon ni Presidente Rodrigo Duterte batok sa illegal nga drugas.

Kini maoy unod sa 40 ka pahina niya nga report sa iyang gihimo sulod sa 18 ka adlaw nga siya nagsilbing co-chair sa Inter-agency Committee on Anti-illegal Drugs o ICAD.

Matud ni Robredo palpak ang kampanya tungod kay ang kagamhanan misentro lang sa kampanya paglutos sa mga gagmay nga negosyante sa drugas.

Gani sigun kuno sa talaan sa Philippine Drug Enforcement Agency kon PDEA usa ka porsiento lang sa kinatibuk-ang supply sa drugas dinhi sa nasud ang nasakmit sa mga awtoridad.

Ug sigun sa datus sa Anti-Money Laundering Council mokabat lang og P1.4 bilyones nga kantidad sa mga kabtangan nga gidudahang konektado sa illegal nga drugas ang napugngan sa gobyerno sukad niadtong tuig 2017 hangtud sa 2018.

Dili perpekto ang kampanya sa administrasyong Duterte batok sa illegal nga drugas. Kini maoy kamatuoran nga dili malalis.

Apan sa tanang nahimong pangulo sa nasud, wala pay nakahimo sa gibuhat ni Duterte.

Ka anugon sa higayon nga gihatag kang Robredo nga iyang giusikan sa pagpangita og sayop sa kampanya sa administrasyon inay nga motabang unsaon nga kini mapalambo sa paagi nga iyang gusto.

Sa report nga iyang gipagawas, natataw ang kamatuoran nga sulod sa 18 ka adlaw nga siya nangatungdanan isip co-chair sa ICAD wala gyud siyay laing gibuhat gawas sa pagpangita og sayop nga mamahimo niyang gamiton pagdaut sa kampanya sa gobyerno.

Subo nga inay motabang ang bise presidente sa kampanya pulos panaway ray iyang gikaampo. Dako unta ko og pagsalig niya apan nakawang tungod kay tataw nga iyang nalimtan ang mga maayong mithi nga kabilin sa namatay niyang bana ug maoy nipasuwabi ang iyang paggakos sa traditional nga paagi sa politika.

Kun alang ni Robredo kuwang pa ang gihimo sa gobyerno taliwa sa daghan na nga mga giilang drug lord nga napatay sa operasyon sa kapolisan, ug dili pa igo ang kapin sa usa ka bilyon nga kantidad sa katigayonan nga konektado sa drugas nga napugngan pinaagi sa AMLA. Nganong wala man siya mokwestiyon unsay gihimo sa iyang kaalyado sa politika niadtong si Noynoy Aquino pay nagtungkawo sa Malakanyang?

Pila bay kantidad sa drugas nga nasakmit panahon ni Aquino? Pila ba ka mga durugista ang napatay ug nadakpan sa ilang panahon?

Ug pila bay kantidad sa mga kabtangan sa mga durugista nga ilang napugngan?