Hasol apan kaayohan sa tanan

Nakaani og managlahing reaksyon ang hugot nga seguridad nga ipatuman sa kapolisan sa nagkadaiyang kalihokan sa Sinulog Festival 2020.

Kini ang naandan nga no backpack ug ang clear bag policy sa mga mosulod sa Basilica del Sto. Ni?o ug sa Cebu City sports Center.

Sumala sa uban nga over ra kaayo ang naasoyng security policy kay unsa naman lang daw ang gamiton sa mga tawo nga bag kadtong makita ang tinae o ubang mga naa sa sulod niini nga makadani sa mga kawatan kay nakita naman ang sulod niini.

Sa habig sa kaparian sa Basilica del Sto. Ni?o, nanghunaw sila niini tungod kay ang Cebu City Police Office man ang nagmugna ug nagpatuman niini. Walay mahimo ang mga pari tungod kay ang mga pulis man ang frontliner sa kahapsay ug kalinaw atol sa kalihokan sa Sinulog.

Gipasabot sa labaw sa CCPO nga si Col. Engilbert Soriano nga ang ilang gihimo mao ang paghatag og kasegurohan sa kaluwasan sa katawhan.

Dili gusto sa kapolisan nga malutsan og bisan gamay nga hulga sa peace and order busa himoon nila ang tanan aron maprotehian lang ang mga tawo.

Usa sa gialmahan sa mga tawo ang signal shutdown diin usa sa dunay negatibong pagtan-aw niini mao si besi Mayor Mike Rama.

Nahingawa siya nga dili makakontak ang mga tawo simbako og dunay emergency nga mahitabo.

Apan angayan hinunduman nga dunay pamaagi niini ang mga otoridad aron dali nga makaresponde sa mga emergency cases gamit ang mga high fequency radio ug duna usay mga support groups nga moabag sa pagbantay.

Gawas pa nasuwayan naman kini sa nangaging katuigan og epektibo man kaayo. Gani matud sa mga otoridad nga niminus ang kawat dihang gibawal ang backpack.

Kini tungod kay sagad gamiton sa mga kawatan ang backpack isip concealer sa ilang kamot nga mokuot sa mga butang sa mga tawo labi na sa mga pampublikong sakyanan.

Apan mas dako nga hulga ang gipangandaman sa mga otoridad mao ang terorismo.

Nahingawa ang uban nga dili makakontak kon i-shutdowna ang signal sa cellphone apan nataligam-an nato ang dakong peligro kon naay signal.

Ang cellphone mao ang gigamit sa mga terorista sa pag detonate sa mga bomba.

Wala man ta moingon nga naay mga terorista sa Sugbo apan mas maayong pangandaman ug dili sila hatagan sa kahigayonan nga makatisok og kasamok sa atong dapit.

Busa makaingon ko nga maayo kining gihimo sa kapolisan nga angayan natong Suportahan.

Gamay ra intawon ang mga pulis itandi sa kadaghan sa mga tawo nga ilang bantayan.

Bahala og OA o overacting basta luwas kita gikan sa mga posibleng dautan nga panghitabo simbako lang.

Aron dili kita mahasol, motuman nalang kita sa lagdaw sa kalinaw, uwahi ra gyud kanunay ang pagmahay.