Eksperimento sa habal-habal
Makapahibung ang mga eksperimento nga gipasiugdahan sa Department of Transportation (DOTr) sa pagtugot sa mga motorsiklo nga mamasahero sa Metro Cebu ug Metro Manila kay:
• Ang unang hugna gikan sa Hunyo hangtod sa Disyembre ning tuiga gisumpayan og laing hugna sa way pagpahibawo unsay nahitabo sa niaging unom ka buwan—luwas ug mapuslanon bang mga habal-habal ug nakapahapsay o nakapahuot ba sa trapiko; ug
• Mao pa gani pagsugod sa ikaduhang hugna nideklarar nang Land Transportation Franchising and Regulatory Board (LTFRB) nga wa nay motorsiklo nga tugotang makapamasahero lapas sa Marso 2020.
* * *
May sukaranan ang mga kabalaka nga nagbadlis-badlis lang sa papel ang mga sakop sa Technical Working Group (TWG) sa DOTr ug LTFRB ug wa gyoy tinguha sa paghimo og tinuod nga paniid sa mga implikasyon sa pagpamasahero sa mga motorsiklo.
Mahimong napugos lang sa temporaryo nga pagtugot sa mga motorsiklo nga mamasahero sugod sa tungatunga ning tuiga tungod sa kusganong awhag sa mga senador ug mga kongresista.
Gani, ang House of Representatives nakapasar gyod sa balaudnon nga maglegalisar sa mga habal-habal apan naapsan lang sa panahon ang mga senador.
* * *
Nagkabulingit sa mga pagsaway ang DOTr ug LTFRB tungod sa taphaw nilang mga lagda. Gawas nga way katin-awan nganong gilugwayan og laing tulo ka buwan ang orihinal nga eksperimento, wa sab magtagad paghatag og mga sukaranan giunsa pagtakda ang gidaghanon sa mga motorsiklo nga tugotang makapamasahero sa Metro Cebu ug Metro Manila.
Pila man ka motorsiklo nga gitugotan nga makapamasahero sa niaging unom ka buwan? Igo, kuwang o sobra ba sa paghakot sa mga pasahero? Nganong siyam ka libo ra man ka motorsiklo ang tugotang makapamasahero sa Sugbo hangtod sa Marso?
* * *
Kun tinuod pang naniid ang TWG sa pamasahero sa mga motorsiklo sa niaging unom ka buwan, ila untang nahibaw-an nga gawas sa Metro Cebu ug Metro Manila ang tanang drayber sa habal-habal, di lang ang riders sa Angkas, sa tanang kabaranggayan sa tibuok nasud gawasnong nangontrata og mga pasahero ug kargamento.
Ug kun tinuod silang nagsubay sa industriya sa transportasyon nahibawo nang daan nga sama sa ilang kapakyas sa wa pang eksperimento di gihapon nila mabadlong ang mga habal-habal human sa Marso.
* * *
- Latest
