Malangay ang forever
Sukwahi sa pasalig sa pamunoan ni Presidente Rodrigo Duterte di pa mapahimuslan sugod karong bag-ong tuig ang balaod nga mohimo nang permanente sa numero sa telepono sa mga konsumidor bisan mobalhin pa sila og laing network.
Matud sa higanteng mga kompaniya sa telepono unya pa sa Oktubre 2021 magsugod mobile number portability (MNP).
Sa ato pa, di matuman ang pasalig ni kanhi Department of Information and Communications Technology (DICT) Undersecretary Eliseo Rio Jr. nga maatiman na ang mga aplikasyon alang sa lifetime mobile phone numbers karong Enero 1, 2020.
* * *
Unsa may hinungdan sa kalangay? Di ba Pebrero 2019 pa napirmahan ni Presidente Duterte ang Lifetime Cellphone Number Act?
Di ba nga Hunyo 2019 pa naumol ang implementing rules and regulations (IRR) sa Republic Act No. 11202 nga nagsugo nga tukuron nang kahimanan pagpatuman sa MNP niadto pang Hulyo 2 karong tuiga?
Unsa man diay ang nahitabo sa niaging lima ka buwan?
Nganong ang Globe Telecom Inc., Smart Communications ug Dito Telecommunity Corp. sa niaging semana pa man nikontrata og mobile numer portability service provider (MNPSP)?
* * *
Gitabonan sa mga telco ang kalangay pinaagi sa panghambog nga ang ubang kanasuran naabtan og 27 ka buwan, o kapin duha ka tuig, pagpatuman sa MNP. Nipasalig ang ilang gikontratang Syniverse Technologies sa Florida sa Estados Unidos nga mahumang sistema sa 18 ka buwan.
Ang wa nila isulti mao nga ang Oktubre 2021 nga pagsugod sa MNP di 18 ka buwan kon dili 22 ka buwan human sa pagpirma sa kontrata, o 29 ka buwan human sila sugoa sa IRR pagsugod og tuman sa balaod.
* * *
Wa magdali ang mga telco kay gawas nga silay mogasto sa software, hardware ug ubang panginahanglan sa sistema ang Globe ug Smart, ang duha ka higanteng telco, nahibawo nga ang Dito, ang kinabag-ohang telco, makapahimus sa balaod kay mas sayon mang mobalhin ang ilang subscribers kon mapabilin ang ilang mga numero.
Makabentahang mga konsumidor kon inay magkonsabo pagpaburot sa ilang ginansiya ang mga telco magpuhalay pagpalambo sa ilang serbisyo. Magbantay hinuon ta kay ang pasiunang timaan nagpasidaan nga sama sa nangaging mga lagda mahimong sabotaheon gihapon sa mga telco ang bag-ong balaod.
* * *
- Latest
