Ikaupat nga taytayan

Dugay pa mahuman ang kasamtangang konstruksiyon sa moderno ug world-class nga taytayan nga magdugtong unya niining dakbayan sa Sugbo sa mainland Cebu ug sa lungsod sa Cordova sa silingan nga isla sa Mactan. Apan aduna nay plano mahitungod sa pagtukod og laing tulay nga gidiga karon sa kagamhanan nga magdugtong sa mainland ug sa isla sa Mactan. Ug kini magkonektar sa Cansaga sa lungsod Consolacion ug sa dakbayan sa Lapu-Lapu.

Hinuon hagbay ra nga gi-proposed ang pag-contruct sa ikaupat nga taytayan. Kini gumikan lagi sa nagkagrabe nga sitwasyon sa trapik sa duha ka kasamtangang tulay nga nagkonektar sa siyudad sa Mandaue ug dakbayan sa Lapu-Lapu.

Gani, dili pa lamang dugay, mipagawas na ang Department of Public Works and Highways (DPWH) og perspective sa ikaupat nga taytayan ug ang proposed arterial road network niini human sa preparatory survey sa maong proyekto.

Sa tentative project component niini, ang fourth Cebu-Mactan Bridge adunay 3.3 kilometro nga gitas-on. Nagtangag kini og upat ka lane nga duha matag side ug adunay design speed nga 60 kilometro matag oras.

Ang nakanindot sa maong proyekto mao ang arterial road network nga nagsumpay sa maong taytayan. Kini naglangkob sa konstruksiyon sa Mandaue City Coastal Road nga adunay gitas-on nga halos lima ka kilometro.

Hinaut nga madayon sa dili madugay kining maong proyekto ilalum niining administrasyon ni Presidente Rodrigo Duterte. Hinaut nga dili lamang kutob sa papel ang maong plano kay wala makasulbong gumikan sa dula sa politika. Nagkinahanglan ang Sugbo og ingon niini ka dako nga mga inprastraktura aron pagtubag sa nagkadako nga populasyon ug nagsulbong nga mga establisimento. Ug angay lamang nga maghugop kitang tanan pagduso sa katumanan niini.