EDITORYAL - Sinug sa libudsuroy

Usa ka maayong lakang ang gihimo sa Cebu City nga paapilon ang mga batang libud-suroy nga maka-perform sa umaabot nga Sinulog 2020 pinaagi sa Sinulog sa Palaboy.

Ang labing sadya nga selebrasyon dinhi sa Sugbo mao ang Pista sa Senyor Sto. Niño matag bulan sa Enero. Magdasok ang mga bisita gikan sa mga deboto ngadto na sa mga bisitang ang tuyo mao ang kalingawan.

Ang pagdugang sa bag-ong programa nga “Sinulog sa Palaboy” mopakita sa talento sa pag-Sinug sa mga batang libud-suroy sa siyudad.

Gibanabanang 200 ka mga batang gikan sa nagkalainlaing mga barangay nga naa lang magpuyo sa karsada ang giimbitar aron sa pagsalmot.

Pakapin sa ilang pagsayaw sa tradisyonal nga Sinug, mao ang pag-atiman kanila sumala pa sa nag-organisar niini nga si Val Sandiego, Project Director of the Sinulog Governing Board (SGB).

Wala hinuon madetalye og maayo kun unsa nga “pag-atiman” ang gipasabot apan para gyud kini sa ilang kaayohan.

Ang mga bata monitoron gihapon bisan nahuman na ang Sinulog, sa ato pa atimanon gihapon ilang panglawas, edukasyon, pagpaapil kanila sa mga paugnat sa kusog sa siyudad.

Kani lang daan makatabang na pag-develop kanila nga mamahiongug aron sila mapuslan sa katilingban inay nga pasagdan ug mahimong labad sa uban.

Unta dili lang kini kutob sa papel o estorya. Tungod kay dili tiaw ang palibot ug kinabuhi aning mga bataa diha sa karsada nga maglibud-suroy ug magpangayo sa mga tawo ug kun asa lang maabtan sa pagsawop sa adlaw, adto ra sab sila mangatulog.

Gawas pa niana, dali silang matintal sa mga butang nga wala kanila maong dali silang malambigit sa krimen.

Ang ingon niini nga mga programa kun seryusohon ug tinud-on pinaagi sa paghatag og suporta sa gobiyerno makahatag gyud og dakong kalamboan sa kinabuhi aning mga bataa ug sa ila mismong pamilya.

Angay kining kapanaminan kay bati man sab tan-awon nga manghambog ang siyudad nga usa sa mga adunahang LGU sa nasud apan wala kaatiman sa mga batang libud-suroy, angay hinumdoman nga si Senyor Sto. Niño usa sab ka bata.