Modus sa rapist

Nauso na ang rape dinhi sa ato. Daghan nang inosenting babaye ang nahiagom sa kahangol ug kabangis sa mga rapists, kinsa walay kukaluoy mopatay sa gi-rape nga nanglimbasog pagsukol aron dili mapusgay ang inampingang pagkababaye.

Luoy ang mga ginikanan. Gikan sa sabakan hangtod sa pagdako sa anak, ilang gialimahan ug giampingan.

Hangtod nakahumag kurso, nakapasar sa board exam ug nakasulod og nindot nga trabaho.

Apan sa usa ka hugna sa kinabuhi, gilugos ug gipatay lang kini sa mga walay puangod nga anino, kinsa pulos nakasuyop sa gidiling aso.

Nagkaanam kadaghan ang rapist. Kini segun lang sa mga heinous crime nga namantala.

Ug mapun-an pa gyod unta ang gidaghanon kon wala pilia sa ubang mga gipanglugos ang pagpakahilom na lang kay sa iladlad sa publiko ang pait, makauulaw nilang kasinatian.

Ang County Sheriff’s Department (kini base sa nadawat kong message sa Facebook gikan sa gawas) mipahibalo nga may bag-ong modus ang mga rapists karon. Kinahanglan kunong magmatngon ang mga babayeng mopaingon sa ilang trabaho, eskuylahan ug bisan sa pagdrayeb o paglakaw sa dalan nga mag-inusara.

Kon adunay batang naghilak sa dalan, unya ipabasa ang gibitbit niining gamayng papel nga gisulatag address ug mohangyo-pakiluoy nga magpauban, ang tanang kababayen-an hugot gipasidan-an sa naasoyng departamento, nga dili gyod motubay.

Pait kon madala ang babayeng manggiluy-on ning matang sa bag-ong modus. Sanglit, mga gang boys ang mipasiugda niini ug delikado nga kalingawan lag pulipuli sa mga dukirok ang pag-gang rape sa ilang mabiktima.

Unya human matagbaw, patyon ug ilabay lang ngadto sa kalibonan.

Mga girls, labi na sa mga batan-ong estudyante, empleyada o hanip sa porma, kamo ang target nila. Ingkaso’g makasugat kamo sa dalan og senariyo nga susama niini, ayaw gyog sakay sa ilang drama.

Hinunoa, mas maayo nga motawag og polis ug pasagdi nga sila nay moukay-susi ning maong situwasiyon aron ilang masayran kon tinuod ba gyod nga nanginahanglag tabang ang bata, o gihimo lang kining paon ning bag-ong modus sa mga gang rapists?

Ning panahon nga mikatap nang adik-adik sa Pilipinas, nahimong ordinariyo na lang ang pagpanglugos ug ang pagpatay sa gilugos.