Walay presyo ang pag-ampo!

Miani og nagkadaiyang reaksyon ang pinalahi nga fundraising sa Pasko sa usa ka simbahan sa dakbayan sa Mandaue diin dunay wishing o intention card nga dunay presyo.

Color coding kini depende sa presyo niini og ibitay sa Christmas tree diin kadtong dakong presyo nga intention card mabutang duol sa imahen sa Batang Hesus.

Kini na-upload sa social media nga gikuninitan usab dayon sa mga netizens kinsa kasagaran mga judgemental ra usab

kaayo nga mibanat sa ilang pagsaway sa gihmo sa nagpasiugda niini.

Gani dunay mga mikwestyon nga duna ba diay presyo ang pag-ampo nga kadtong dako ang kwarta mas madungog ba ang pangaliya samtang kadtong gamay ra hinay ra usab kay layo man ang card, ug dili madungog ang pag ampo kadtong dili mopalit sa card?

Dili usab nato mabasol ang mga tawo kon ingon niini ang naabot sa ilang hunahuna seguro kay nakatanom na sa ilang hunahuna nga pangwarta nalang gyud ang gihuna huna sa simbahan.

Apan in fairness sa nagpasiugda sa fundraising, dili pinugsanay ang pagpalit sa card diin kadto ra ang gusto mopalit ang makakuha niini.

Angayan lang seguro magbagutbot ang mga tawo kon gihungit o gipugos gyud ang mga Katoliko sa pagpalit sa intention card.

Dili sa paglaban sa simbahan kay usa man sad ko ka Katoliko, apan ang naasoyng programa gitumong man alang sa pagpalambo sa mga proyekto alang sa mga parokyano.

Ang intention card mao kini ang gitawag nga “USP or Unique Selling Proposition” aron madani ang mga tawo sa pagkuha sa card nga gilain lang sa pagsabot sa mga tawo.

Dili sa pagpanaway sa ubang sekta, ang mga magtutuo nila duna gyuy certain percentage nga gilatid kon pila ang ilang ihatag ngadto sa ilang simbahan.

Pero wala gyud ta nakadungog nga nireklamo sila o gi-bash sa social media kay nagkahiusa sila sa katuyoan nga pagsuporta sa mga programa sa ilang simbahan.

Sa mga nanaway sa wishing card, nipalit ba mo niini? unsa man ang inyong nahimo aron makatampo sa mga programa sa simbahan? basin kutob ra kamo sa pagpanaway.

Kana ra ang mga sige og panaway mao ra sad na ang walay natampo kay himoon nga justification ang ilang kritisismo nga dili mokuot sa bulsa alang sa mga proyekto sa simbahan.

Ang pag ampo dili baligya kay wala kiniy presyo, seguro sa sunod nga mga programa nga naglambigit og kwarta likayan nalang unta sa simbahan aron dili mabiktima sa paghukom sa mga tawong yawyawan ug reklamador.