Two Timer

Dunay usa ka babaye kang kansang pangalan nindot paminawon. Tam-is pa sa lansones ang iyang pahiyom ug gani maayo kaayo siya modala og gakus gakus. Sa laktod, sweet nga pagkatawo. Ang maong babaye sa wa lang damha human sa iyang pa cute nasakpan nga dunay laing gikabuangan nga sama pud niya utro pud nga buangon. Managsama silang mga two timer ning kalibutan sa mga maluibon.

Bisan pa man kun ingon ini ang kalibutan ang Dios maoy bugtong magpabiling matinud-anon sa tanan. Mahimong budhian kita sa atong mga mahal sa kinabuhi apan ang Dios dili gyud mahitabo nga mobiya kanato anaa lang gyud siya kanunay.

Sa atong ebanghelyo kagahapon atong nakita si San Jose nga nahimong nagduhaduha kun iya ba gyud nga imantala ang tinud-anay nga kahimtang ni Maria. Giingon nga si Jose tawo nga matarong. Ug kay tawo man siya nga matarong nagpasabot kini og pagkamatinud-anon sa balaod sa Dios.

Ang babaye nga hisakpan nga buntis apan way bana ang mahimong silotan sa kamatayon pinaagi sa pagbato. Ang unang mobato mao gyud ang amahan o igsuong lalaki kay ang isyu dili lang sa pagmabdos kondili usab sa pagpakauwaw. Apan kining tanan wala himoa ni Jose tungod kay sa dihang nagpadayag kaniya ang anghel mahitungod sa tinud-anay nga kahimtang ni Maria mas gimaayo nga tumanon niya ang kabubut-on sa Dios kaysa bisan unsa nga gilatid sa balaod.

Ang sanglitanan nga gipakita ni Jose usa sa mga sanglitanan nga angayan natong sundon diha sa atong pagtuman sa kabubut-ong Diosnon. Kay ning pasko sa pagkatawo sa atong manunubos giawhag kita sa pag angkla sa atong kaugalingong kaugmaon ngadto sa Dios nga maoy tuburan sa tanang kaayo.

Si Maria bisan pa man sa kakuyaw nga mahimo niyang mahiagoman gumikan sa iyang kahimtang ang nituman sa mando sa Dios samtang si Jose usab ingon nga tawong matarong ang wa magsapayan kun unsa ang isulti kaniya sa mga tawo. Ang tanan iyang gihiklin gumikan sa iyang dakong paghigugma sa Dios. Gihimo niya ang tanan alang sa mas dako ug hataas nga destino nga mao ang kaluwasan sa matag usa kanato. Kaninyong tanan! Maayong Pasko! Atong pamalandongan kining maong paskohanong awit ni Boney M.: