Nagbitik sa anino

Gipasigarbo sa gobyerno ang pagkunhod sa gidaghanon sa mga kabus dinhi sa nasud basi sa labing awahing datos nga gipagawas sa Philippine Statistics Authority.

Sigun sa survey sa PSA miminus og dul-an 6 milyones ang gidaghanon sa mga pobre niadtong 2018 itandi sa datos niadtong 2015. Matud sa ahensiya,  17.9 milyones nalang ang mga kabus niadtong 2018 gikan sa 23.5 milyones niadtong 2015.

Pasabot sa National Economic Development Authority (NEDA), ang ang hinungdan niini mao ang pagpagsaka kuno sa suholan ug daghan  nang trabaho nga mamahimong kasudlan ang mga Pilipino. Ang gibasihan sa PSA pag-ila kinsay maisip nga pobre mao ang per capita income sa usa ka pamilya nga dunay lima ka sakop. Ang per capita income nagpasabot sa total nga kita sa tibuok sakop sa pamilya sulod sa usa ka buwan.

Sa talaan sa PSA maisip nga kabus ang usa ka pamilya nga dunay lima ka membro kun ang ilang binuwan nga income ubos sa P10,700. Giunsa pakab-ot sa PSA ang maong kantidad?

Scientific ang formula nga ilang gisubay sa pagkwenta niini, apil na ang gidaghanon sa calories nga kinahanglang makunsomo sa matagmembro sa pamilya. Sa kakuti sa ilang gisubay nga formula malipong ka nga magbasa.  Apan alang nako dili ni maoy mahinungdanon. Ang labing importante tukma ba ang kantidad sa poverty threshold. Dili kaha panahon na nga usbon ang basihan sa poverty threshold ug pag-compute niini aron mahatagan sa hustong giya ang atong mgapolicy makers?

Dunay nagkalainlaing paagi unsaon pagkuha ang poverty threshold sa usa ka nasud. Kita dinhi sa Pilipinas ang atong gibasihan mao ang per capita income.

Sa akong tan-aw dili na haum ang per capita income nga maoy  basihan sa computation sa poverty threshold. Dilikaha maayo nga kuhaan nato og basi ang kantidad  sa atong kwarta?

Sa laktud ang purchasing power sa matagpamilya maoy atong basihan pag-ila kabus ba sila o dili. Kay kun imong tan-awon ang poverty threshold nga kapin sa P10 mil, kitang tanan sayod unsa ray mahimo sa maong kantidad.Alang sa usa ka pamilya nga dunay lima ka sakop dili gyud paigo ang maong kantidad sa ilang batakang panginahanglan. Ang abangan lang sa panimay ug sa kunsomo sa suga ug tubig, hayan wala nay mahabilin para sa ilang pagkaon.

Kadudahan sab ang pangangkon sa NEDA nga ang hinungdan  nganong migamay ang gidaghanon sa mga kabus tungod sa pagsaka sa suholan tungod kay sayud tang tanan nga ang umento nga gitugot sa mga regional wage board maguwang lang og gyutay sa limos. Sumala og duna bay epekto ang P15 ngato sa P25 nga umento sa suholan? Hangtud kanus-a ta pabiling magdamgo ug mahigmata sa kamatuoran? Hangtud nga dili mahiuyon sa realidad ang mga polisiya sa gobyernoo tungod sa dili husto nga mga basihanan, magpabiling uyamot ang mga kabus.

Angayang hunungon na ang ingon niini nga matang sa pag-ulog ulog aron kunohay ipakita nga nilambo ang atong ekonomiya alang sa personal ug politikanhong tumong tungod kay sama ra nga nagbitik ta sa atong kaugalingong anino.