Ang post ni Padre

Dunay kaila nakong pari nga ni post sa iyang wall sa FB. Ang maong post nagkanayon: “An Apology without change is Manipulation!” daghan kini og likes ingon man daghan pud ang comments. Apan kun buot hunahunaon dunay kamatuoran ang maong post kun maghisgot kita og matuod nga pagsinati sa metanoia kun kabag-ohan sa atong kinabuhing tawhanon. Daghan ang mga hinungdan kun nganong ang mga tawo kutob lang sa pagpangayo og pasaylo apan dili gyud magbag-o.

1. Una, mao nga sayon ra gyud ang pag ingon og sorry labina kun pakapinan kini og inartistang bakho sa bakakong mga ngabil.

2. Ikaduha, ang pagbakho mahimong kahimanan sa pagkuha og simpatiya gikan sa nasad-an apan wala kini magpasabot nga ang maong bakho matuod nga pagbangotan sa mga tawong nasayop. Ang uban kanila nibakho tungod kay maoy ilang tripping.

3. Ikatulo, daghan ang komportable sa kinabuhi sa sala sanglit ang ilang gihunahuna mao raman ang ilang personal nga katagbawan at the expense sa ubang mga tawo nga naligsan gumikan sa ilang kasaypanan.

4. Ikaupat, ang uban nakaumol og gitawag natong co dependency mao nga padayon gihapong nahimo ang mga pang abuso gumikan kay ang nasad-an niuyon nga sila abusohan. Sa laktod nga pagkasulti sila gi manipulate sa mga tawong haniti kaayo ning matanga sa lingla. Mao gyud nga ang gipamulong nga nagkanayon: “An Apology without change is Manipulation!” usa ka matuod nga hitabo nga mahimong masinati nimo ug mahimong sination nako.

Dunay inahan nga nisumbong kanako nga iyang anak usa ka adik. Makapila ang iyang anak nangayo og pasaylo ug sa maong mga pagpangayo og pasaylo padayong nalukmay ang iyang pagbati Daw sama siya sa ice cream nga matunaw kun luha sa iyang adik nga anak molugmaw. Mao nga padayon siyang naulipon sa gugma nga way hustong panghunahuna butang nga nakapahimo niyang makalolooy sa kaulahian kay iyang anak bisan magbagulbol siya, padayon man gihapon niyang hatagan.

Laing sugilanon mao nga dunay usa ka tawo sa gawas sa nasud nga nahimong maglisud og buhi sa iyang kahilig sa pagkaon og bisan unsang lami. Gani dunay programa nga giulohan og: “The man who ate himself to Death!” kini tungod kay mismo ang iyang asawa ang di man makabalibad sa mga higayon nga ang iyang bana mangayo sa kinaham niining pagkaon bisan pa man kun kini makadaut sa iyang lawas. Lagi tungod kay ang asawa nabutaan sa gugma nga salingkapaw lamang.

Ning panahon sa Adbiyento mahinungdanon kaayo ang pagpaminaw sa pagtulon-an ni Juan Magbubunyag nga unta atong biyaan ang atong mga sala aron sa ingon mamahimo kitang angayan sa pagsugat sa atong Ginoo ug Manunubos ang Hari sa tanang mga Hari! Way komo sa pagtulon sa atong garbo kay after all di man kini makapatambok.