EDITORYAL - Mas maayong andam

Kaniadto grabe kaayo ang epekto sa bagyo sa katawhan, dili lang sa danyos sa kabtangan ug sa umahan kondili sa ilaha mismong kinabuhi.

Apan sa paglabay sa panahon, pinaagi sa pagabag sa gobiyerno ug sa international community nga nagtutok sa kalamidad sa tibuok kalibotan nakat-on ang mga Pilipino sa pagpangandam.

Ang matag bagyo nga mosud sa Pilipinas dunay talagsaong kusog dili parehas sa uban. Mao nga importante gyud ang preparasyon samtang layo pa kini.

Usa sa mga makalilisang nga bagyo nga miigo dili palang dugay sa Pilipinas mao ang Typhoon Haiyan o Bagyong Yolanda nga nagdala og hangin nga kapin 200 kilometro matag oras.

Layo pa kini nakita na kini sa tanang weather monitoring stations sa kalibotan ug nagpungasi ang mga pasidaan.

Ang gobiyerno sa Pilipinas nanagana gyud adtong panahona pinaagi sa pagpadala daan sa mga gikinahanglan unya sa mga maapektahan.

Apan kay lagi lahi-lahi og kinaiya ang matag bagyong mosud dinhi, gikusokuso ug gikumotkumot ang Eastern Visayas, Central ug Western Visayas hinungdan nga daghan ang mga nakalas apil na ang mga giposisyon na daang mga responders ug mga relief goods.

Pinaagi niini, hinaut nakat-on na ang gobiyerno sa Pilipinas sa klase sa pagpangandam nga ilang himuon matag dunay nagpadulong nga bagyo.

Ning pagsulod sa bagyong Tisoy, gihimong kataw-anan sa uban ang pagdeklarar sa mga local officials sa Sugbo og walay klase sa mga pangpublikong mga eskuylahan, kay lagi duna may pipila ka lugar nga wala gyud mag-uwan samtang duna say giuwan.

Apan tingali kulang lang sila sa edukasyon ug pagpasabot, nga bahala na og overacting basta ang importante nakapangandam.

Mas maayong nakapokus ang gobiyerno pag-monitor sa mga maapektahang mga dapit ug dili na maapil pa sa ilang hunahunaon ang kaluwasan sa mga tinun-an diha sa kadalanan, mao sab kini sa sitwasyong bation sa mga ginikanan.

Mas maayong naay giandam nga wala kinahanglana, nungka sa pagabot sa panahon nga gikinahanglan diay apan wala pangandami.