Naunay ko uy!

Nahimo ko nga reporter ug radio announcer sulod sa 35 ka tuig, ug ang 11 ka tuig niini isip police/military beat reporter.

Usa ako sa mobalita kun adunay mga aksidente, apan kaniadtong Huwebes sa udto, ako maoy nahimong “subject” sa balita sa social media.

Nakasuway na ko nga naaksidente nga natumba sa motorsiklo, apan karon lang ko makasuway nga nadam-agan ko og sakyanan.

Nabagnos ko og mga tunga sa dupa uban sa akong pinangga nga motorsiklo.

Wala kaayo magrabehi ang akong nawong kay nag-helmet man ko.

Apan kay “half face” man ang type sa akong crash helmet, nasamad gihapon og gamay ang akong aping. Maayo na lang hinoon kay kun wa pa ko mag-helmet, dako gyud og kadaot ang akong ulo.

Magtigum gyud ko og kuwarta aron makapalit og closed type nga crash helmet.

Gituyo nako ni pagsugilon kaninyo aron kadtong wala pa gyud mag-helmet, maleksyon na unta ug mag-helmet na.

* * *                 

Ikaduha nga isyu, ang lagda sa Transportation and Traffic Code mao nga kun ikaw nag-drive og sakyanan nga gikan sa mga private roads o kaha secondary roads, maghuwat gyud mo nga “safe” na ilabang ug dili na peligro nga makadisgrasya.

Mao kini ang nahitabo nako niadtong Huwebes kay samtang nagtungas ko sa Veterans Drive, ang Koreano nga nagmaneho sa iyang sakyanan gikan sa gate sa Marco Polo Plaza Hotel, mitabok sa karsada samtang nagdangadanga na ko.

Wala na gyud nako mapugngi ang akong motorsiklo bisan giunsa pa nako sa paglikay.

Lisud lagi kun ang usa ka driver dili suhito sa balaod sa pagmaneho og sakyanan, kutob ra sa pagpadagan.

Apan mao lagi, matud sa uban nga ang pagpakasala tawhanon, ug ang pagpasaylo balaanon.

Gikan sa pagkahitabo, wala gyud ko mopasaka og kaso sa driver sa sakyanan nga nakadam-ag nako.

Nagamit gyud ang akong pagpasar sa Neuro examination nga magpabiling kalma.

Ang uban pa to, tionan na sa ilang armas.

Pagsuwat nako niini, dia pa ko sa akong hospital room nagpaalim sa daghang samad nga akong naangkon.