Reklamo sa proper forum

Hilabihan ka init ang isyu kalabot sa maestra nga gipa-Tulfo sa apohan ug mga ginikaman sa usa ka tinun-an.

Kini human nga gipakauwaan sa maestra ang bata pinaagi sa pagpalingkod niini sa gawas sa classroom tungod lang kay wala madala pagbalik ang iyang class card kay nalimtan sa balay.

Nakita ang gihimo sa maestra sa tinun-an pinaagi sa CCTV camera diin ang bata gipanan-aw usab sa lain nga mga tinon-an hinungdan nga nauwawan intawon ang bata. Sa usa ka ginikanan masuko gyud sa gihimo sa magtutudlo nga pakauwawan ang usa ka anak, gani puwede mosulong sa eskwelahan ang maestra.

Nag-atubang na sila sa principal sa maestra kinsa admitido nga nasayod siya sa iyang gibuhat ug nangayo na og pasaylo.

Apan wala makontento ang ginikanan ug apohan ug ilang gidala ang reklamo ngadto sa media.

Dinhi nasayod ang mga ginikanan tungod kay nasaag sila tungod sa ilang kalagot gusto sila makabaton og instant resbak sa magtutudlo aron mauawan kini nationwide. Sa programa mabati ang magtutudlo nga sinsero nga nangayo og pasaylo sa apohan ug mga ginikanan apan nigara man hinuon si apohan nga gipangayo nila nga mo-resign sa katungdanan ang maestra ug pahuboan sa iyang lisensya isip magtutudlo.

Kini ang pugos nga gidemanda sa media personality ngadto sa maestra aron dili pasakaan og kaso. Sobra na sad kaayo ang gihimo nila sa usa ka maestra nga nagpaubos na nga nangayo og pasaylo apan gipatigbabaw nila ang garbo.

Niadtong panahona natumba na sa kauwaw ang magtutudlo apan giyatak yatakan pa nila.

Pero kon ang maong magtutudlo gahi pa kaayo og ulo ug taas og garbo nga mapahitas-on, seguro ang simpatiya sa mga tawo adto sa reklamante ug sa media personality.

Sakto ra ang gihimo ni madam nga estratehiya nga nagpaubos ug giangkon ang kasaypanam sa sinugdanan pa lang kay nabali karon ang simpatiya nga anaa na kaniya.

Unta to gipaagi sa mga ginikanan sa DEPED ang ilang reklamo aron didto mapangitaan og pamaagi aron dili mahulog sa circus sa trial by publicity. Ako mismo isip ginikanan naay pending reklamo sa DepEd sa usa ka kanhi eskwelahan sa akong anak kay nagtuo ko nga mao kini ang proper forum.

Wala ko mogamit sa akong pagka-media personality batok sa akong gireklamo, bisan gani sa social media wala ko mo status kay nagtoo gihapon ko sa kridibilidad sa DepEd.

Gawas pa nagpatigbabaw gyud ang kamaayo sa mga maestra nga giisip nato nga mga bayani.

Apan sama sa uban sector duna usay mga badlongon nga kinahanglan kuhiton apan pinaagi sa proper forum.