Mga timaan sa rice cartel

Kon tinuod nga nangita og ebidensiya si Presidente Rodrigo Duterte sa pagmaniubra sa rice cartel sa suplay ug presyo sa bugas bisan sa Rice Tarrification Law, makatabang tingali ang bag-ong mga numero nga gipagawas sa Bureau of Customs (BOC) ug Department of Agriculture (DA):

Gipahibawo sa BOC nga karong tuiga niabot na og tulo ka milyon ka tonelada nga imported commercial rice ang nidunggo sa nasud; ug

Nahibaw-an sa Federation of Free Farmers (FFF) gikan sa DA nga 1.5 milyones ka tonelada ray nasudnong konsumo sa bugas humay matag tuig.

* * *

Sa ato pa, bisan unsaon nato og kaon og bugas humay hangtod sa makapabusdik nga kataposang panihapon pagsugat sa bag-ong tuig, mabinlan pa ang mga negosyante og katunga sa ilang imported commercial rice. Bisan di na i-apil pag-ihap ang lokal nga ani sa mga mag-uuma.

Sa ato pa, bisan gidayon pang hukom sa presidente pagsuspenso sa importasyon sa bugas humay, nga kaupat niya usab-usaba hangtod nga nisanong sa iyang economic managers nga higpitan lang ang importasyon, may igong suplay sa bugas humay ang nasud hangtod sa Desyembre 2020.

* * *

Sa di pa motuo ang presidente sa ulug-ulog sa mga opisyal nga naglibot niya nga nibarato nang bugas humay human niya pirmahi ang Rice Tarrification Law, angay niyang sublion ang mosunod nga mga numero:

Nipasalig ang iyang economic managers nga ang pinatuyangang importasyon makalaslas sa presyo sa bugas humay og gikan sa P7 hangtod P10 matag kilo; apan

Gibutyag sa Philippine Statistics Authority (PSA) nga P1 ngadto sa P2 matag kilo ray aktuwal nga us-os sa presyo.

* * *

Angay sang mahibaw-an sa presidente nga pulos taphaw ang mga pasalig sa iyang mga tinudlo pag-imbestigar sa pagpahimus sa mga negosyante:

Ang Department of Trade and Industry (DTI) ug DA igo lang nisaad apan wa gyoy gihimo nga pagtultol sa mga bodega sa imported commercial nga posibleng gitagoan aron di mohagsa ang presyo; ug

Ang BOC nipasalig sab paglusad apan wa magtagad pagpahibawo unsay resulta sa pagsubay sa pasangil sa FFF ug ubang kahugpongan nga mas ubos kay sa ilang palit sa ubang kanasuran ang presyo nga gideklarar sa mga negosyante ngadto sa BOC aron makadaginot sa 35% nga buhis. [email protected]