Subra ra ang arrest order

Miulbo ang dakong kayagaw karon gumikan sa kamandoan ni Presidente Rodrigo Duterte ngadto sa kapolisan pagdakop niadtong nakit-ang migamit sa vape ug ubang matang sa e-cigarettes sa pampubliko nga mga lugar.

Daghan ang mipiyait kun legal ba ang kamandoan ni Duterte tungod kay walay written order nga iyang gipagawas. Gawas pa niini, walay kasamtangang balaud, lokal man o nasyonal, nga nagdili usab sa publiko paggamit batok sa e-cigarettes.

Hasta ang kapolisan naglibog kun unsay ilang buhaton niining maong kamandoan sa presidente. Kay kun manakop gyud sila, aw klaro nga ilegal kana gumikan kay wala may balaud o written executive order gikan kang Duterte.

Gani kutob lamang sa verbal warning ang gihimo sa kapolisan batok niadtong ilang nasakpang migamit og vape ug ubang e-cigarettes sa mga public areas. Hinuon, dala sa pahimangno, ila usab nga gisakmit kadtong mga vaping devices.

Hinuon adunay mga nakaingon nga subra ra usab ang arrest order ni Duterte. Bitaw, bisan ako dakong supak niini. Grabe ra kaayo kining maong mando. Dili man siguro dako nga krimen ang pagyupyop sa vape, bisan pa sa pampublikong lugar.

Hinuon, dili nato ikalimod nga delikado gayud ang paggamit sa vape ug ubang e-cigarettes. Gani, napamatud-an kini sa dihang mitumaw ang taho nga usa ka 16-anyos nga babaye nga nakonpirna nga adunay E-Cigarette o Vape-Associated Lung Injury (EVALI) nga labing unang kaso sa nasud.

Apan ikumpara sa tinuod nga sigarilyo, dili nato ikalimod nga mas minos ang epekto sa vape ug ubang e-cigarettes. Gani, hilabihan na ka daghan ang nangamatay sa mga tiggamitan og tinuod nga sigarilyo tungod sa mga nagkalainlaing sakit sa baga.

Sa akong nakita, wala na gikinahanglan pa ang arrest order ni Presidente Duterte. Sama sa dakong kampanya batok sa tinuod nga sigarilyo, mas labing maayo kun pakusgan usab sa kagamhanan ang krusada batok sa dautang epekto sa paggamit sa vape ug ubang e-cigarettes.