Epektibo ba ang chalk?

Matag higayon nga masinati sa mga drayber ang kadugay mairog sa nagkaanam kadaghan nga naglarayng sakyanan nga lahi ra sa naandang dis-og sa trapiko nga ilang agian kada adlaw, magduda dayon sila nga sa unahan adunay nahitabong disgrasya: kun dili naghagkanay ang duha ka sakyanan, nagsinaghiray.

Ug kay dugay moabot ang polis nga gitawagan pinaagi sa telepono, ang 15 minutos ra untang biyahe, nahimong oras, o mga oras.

Tingale, naeksperensiya sab kini ni Talisay City Councilor Ferdinand Rabaya, hinungdan nga mihikyad siyag usa ka balaudnon sa konseho nga ‘Chalk Ordinance’, diin alang niya maoy usa ka paagi nga makapaluag sa naapektohang dagan sa trapiko panahon nga may ginagmayng aksidenteng mahitabo sa karsada.

Ang gipandayng ordinansa nagmando, nga matag hingtungdang drayber na ang mag-iyahayg badlis o marka ginamit ang tesas (chalk) sa nahimutangan sa masig ka behikulo ug mao poy mokodak sa dulong, likod, wala ug tuong bahin sa lawas niini, ilabi na sa dapit nga may damage.

Dayon, ipadaplin ang duha ka sakyanan aron makaagi ang daghang napurihisyo samtang nagpaabot sa traffic investigator. Ang masakpang walay dalang tesas, silotan.

Nindot ang tumong sa konsehal. Apan ang nagkalainlaing kinaiya sa motorista ang makapamaot niini. Dili tanang motorista edukado ug buotan.

Daghang maldito ug bentahoso. Bisag maoy sad-an, gusto gyod nga ang mogawas sa himuonong sketch, siya ang husto. Ug kaya kaayo ni niyang buhaton sa dili pa moabot ang imbestigador.

Dinhi pa lang, dili kaha magkalalis ang duha ka panig nga delikadog mosangko sa pagpinatyanay?

Dili kada adlaw init. May ting-ulan usab. Moagi kaha ang tisas sa basang dalan? Mapugos ba ang mga drayber kon magpaabot una sila kanus-a motuang ang ulan ug mauga ang dalan ayha pa mosugod pagbinadlisayg chalk?

 Lisod baya husayon kon ang mga sakyanan wala na sa orihinal nga nahimutangan pag-abot sa imbestigador.

Ang sulbad sa suliran dili ang tisas. Ang hustong sulbad mao ang daling pagresponde sa kapolisan kinsa angay motungha dayon inig dial sa 166.

Trabaho sa otoridad ang paghusay ug dili iyaha sa mga drayber. Dapat, may traffic emergency team nga pirmeng alerto nga moadto gilayon sa dapit-nahitaboan.

Mao kini ang labing epektibohang sulbad sa suliran. Ug dili, ang chalk!