Krisis sa bugas humay
Karon pa napugwat ang pamunoan ni Presidente Rodrigo Duterte sa paspas nga pagsulbong sa importasyon sa bugas humay sa mga negosyante. Kay gipahibawo sa Estados Unidos nga naapsan na sa Pilipinas ang China isip labing daghan og nakomprang bugas humay gikan sa ubang kanasuran.
Gibungul-bungolan lang sa gobyerno ang samang pasidaan sa mga mag-uuma dihang gipirmahan sa presidente ang Rice Tarrification Law sayo ning tuiga. Sama sa naandan, wa tagda ang labing gagmay hangtod nga uwahi nang tanan.
Wa pa gyod magkadimao ang mga tubag sa hingtungdan nga mga buhatan.
* * *
Usa sa labing simang nga tubag mao ang labing unang reaksiyon sa Malakanyang sa pahibawo sa US nga kita nay labing dakong importer sa butas humay sa tibuok kalibotan.
Matod ni Presidential Spokesperson Salvador Panelo ang labing dakong problema sa produksiyon sa bugas humay sa nasud mao ang kakuwang sa irigasyon.
Tingali igo lang nisulti sa labing unang butang nga nisud sa iyang ulo, sa way pagsusi sa ubang opisyal nga mas suhito sa agrikultura, nipasabot si Panelo nga lapad ang mga basakan apan gamay rang ani kay way irigasyon.
* * *
Tinuod nga problema ang irigasyon. Nakalimtan ganing Panelo ang kakuwang sab sa post-harvest facilities.
Apan siyaro way nakahunghong niya sa mas dakong hulga: Ang pinatuyangan nga importasyon sa baratong commercial rice.
Wa ra ba gyod matuman ang labing madanihong pasalig sa Rice Tarrification Law: Pagbarato sa commercial rice sa kamerkadohan baleg P7 ngadto sa P10 matag kilo. Segun sa Philippine Statistics Authority (PSA), P1 ngadto sa P2 ra ang us-os.
* * *
Labing makaluluoy ang mga mag-uuma. Gipasaligan og P10 bilyones nga hinabang apan way nadawat nga bisan usa ka dako hangtod karon. Wa pa nahuman ang lalis sa Department of Budget and Management (DBM), nga niinsistir nga may gigahin silang pundo alang sa Rice Competitiveness Enhancement Fund (RCEF), ug sa Department of Agriculture (DA), nga nangangkon nga ang pundo nagamit na nila sa laing katuyoan.
Salamat sa kakuwang sa pagpakabana sa hingtungdang mga opisyal, wa na karoy gikaon ang nagpakaon nato nga mga mag-uuma ug ang mga sakop sa ilang pamilya.
Apan unya na nato sila atimanon kon, sama sa naandan, uwahi nang tanan.
* * *
- Latest
