Laslas sa tapulan

Laslasan sa Senado ang gahin sa Department of Transportation (DOTr) ug Department of Public Works and Highways (DPWH) tungod sa katapol niini sa pag gasto sa pundo alang sa ilang mga proyekto. Mao kini ang gisulti ni Senador Sonny Angara kinsa mao ang Chairman sa Finance Committee sa Senado.

Ang DOTr nangayo og P147 bilyones nga gahin alang sa tuig 2020 apan ang nahisgotang kantidad ihatag sa Senado ngadto sa libreng matrikula sa gobyerno sa programa niining Free College Education tungod sa kapakyas sa DOTr sa pag gasto sa ilang gahin niining tuig 2019.

Basi sa audit report sa Commission on Audit (COA) ang DOTR migasto lamang og 40.74 por siyento sa ilang gahin.

Sa gihimong pagdungog sa Senado sa mga gipangayo nga gahin sa mga departamento ug mga opisina sa gobyerno alang sa tuig 2020 giingon nila ni Senate President Pro Tempore Ralph Recto, Senate Minority Leader Franklin Drilon ug Senador Panfilo Lacson nga luya ug hinay usab ang Department of Public Works and Highways sa pagpundo sa mga proyekto nga mao ang hinungdan sa kapakyas sa programa sa Adminstrasyong Duterte nga gitawag og Build, Build, Build.

Ang DPWH migasto lamang sa gigahin nilang pundo ning tuiga og 42.87 por siyento.

Simple lang ang rason sa mga senador sa ilang pagpanagana sa paghatag sa gipangayo nga gahin sa nahisgotang departamento ug sa uban pang opisina nga tapulan nga migasto. Ilang giingon nga kun wala sila makagasto sa ilang pundo o gahin karon unsa pa kaha kun dugangan pa nila kini.

Kun ugaling suportahan sa mayorya sa Senado ang sugyot sa nahisgotang mga senador dako kini og epekto sa mga proyekto nga pang inprakstraktora nga nakahan-ay na alang sa Sugbo.

Makakompromiso kini sa mga maayong proyekto alang sa Sugbo ilabi na sa proyekto nga gituhoan nga makasulbad sa nagka grabi nga suliran sa trapiko.