Nagkamang pag-uswag

Human sa pipila ka tuig nga pagkaunsiyami, gitugotan na gayud sa konseho niining dakbayan sa Sugbo ang duha ka higante nga developer nga makaugmad na sa ilang dakong proyekto diha sa South Road Properties.

Sa niaging semana, giaprobahan na sa konseho ang aplikasyon sa SM Prime Holding ug Ayala Land Incorporated alang sa ilang joint venture development sa dakong luna atbang sa higante nga shopping mall diha sa SRP.

Dugay ra unta kining nahikay nga proyekto. Gani aprobado na kini sa administrasyon ni kanhi mayor Michael Rama. Naka-operate na unta kini ug sugod na unta nga makakwarta ang dakbayan pinaagi sa buhis.

Kini wala pay labot sa liboan ka mga trabaho nga gipanegurong ma-generate unya sa mga establisemento nga prayoridad nga makabenepisyo mismo ang mga lumulupyo niining dakbayan ug mga kasilinganang lugar.

Apan natanggong ang maong proyekto sa dihang nahimong mayor si Tomas Osmeña, kinsa wala nahimuot sa kasabotan tali sa administrasyong Rama ug duha ka developer. Mao nga iyang gikanselar ang maong deal kay lugi kuno ang dakbayan.

Apan nabali na usab ang hangin human sa pagkapildi ni Osmeña sa nakalabay nga piniliay niadtong Mayo. Niining kagamhanan ni Mayor Edgardo Labella, nabanhaw na usab ang maong proyekto. Ug morag padayon na ang pag-arangkada niini.

Bitaw. Mas maayong madayon na gayud ang maong proyekto. Kini tungod kay dili tiaw ang benepisyo nga maani sa mga Sugboanon gikan niini. Sayang kay naungot kini sa dugay nga panahon tungod lagi sa bangi sa pulitika sa atong nga lokal nga mga opisyal.

Ang katukoran sa maong proyekto mao unya ang mag-abli sa ganghaan alang sa dugang pang development diha sa SRP. Hagbay rang nagpanilap ang mga negosyante nga mobubo og puhonan sa maong lugar. Apan tungod lagi sa politikanhong kagubot, nagkamang na hinuon ang pag-uswag sa SRP.